Memleket basshysy Qazaqstan halqyn Qurban aıt mekeresimen quttyqtady, dep habarlaıdy "Adyrna" ulttyq portaly.
Prezıdent Qasym-Jomart Toqaev óz quttyqtaýynda kóktemgi tasqyndaǵy halyqtyń kómegin atap ótti.
“Qadirli otandastar!
Qurban aıt qutty bolsyn! Bul – ımandylyq pen meıirimdiliktiń, adamgershilik pen adaldyqtyń, janashyrlyq pen jaýapkershiliktiń mán-mańyzyn arttyra túsetin meıram.
Barsha musylmandar asyǵa kútetin qasterli merekeniń taǵylymy zor. Qurban aıtta, eń aldymen, saýaby mol ıgi amaldar jasalyp, eldi izgilikke bastaıtyn qundylyqtar keńinen dáripteledi. Sol arqyly halqymyzdyń rýhanı tutastyǵy nyǵaıa túsedi.
Ata dinimizdiń ulaǵaty bizdiń salt-dástúrimizben tyǵyz sabaqtasyp jatyr. Halqymyz qashanda qıyndyqqa tap bolǵan jandarǵa qol ushyn berip, kómegin aıamaǵan. Kóktemdegi alapat tasqyn kezinde jurtymyzdyń osy asyl qasıeti aıqyn kórindi. Biz yrysty yntymaǵymyzdyń arqasynda kez kelgen qıyndyqty jeńemiz.
Aıttan aıtqa aman-esen jete bereıik!
Duǵa-tilekterińiz qabyl bolsyn!
Ár shańyraqqa amandyq, tolaıym tabys tileımin!”, – deıdi Toqaev.
Aıta ketsek, búgin 16 maýsym Qurban aıt merekesiniń alǵashqy kúni.
