BQO qylmystyq ister jónindegi mamandandyrylǵan aýdanaralyq soty 2024 jyly 5 maýsymda kólik urlaý jáne 12 jastaǵy qyzdy toptyq zorlaý aıyby boıynsha bes adamǵa qatysty úkim shyǵardy, dep habarlaıdy “Adyrna” ulttyq portaly.
Sot 2023 jyldyń 23 mamyrynda sottalýshylardyń biri "Lada" avtokóligin zańsyz ıemdengenin anyqtady. Bir aptadan keıin ol Hyundai avtokóligin esigin buzyp, kóliktiń ishindegi aqshany urlap, ıesine 1 mıllıon teńgeden astam shyǵyn keltirgen. 10 maýsym kúni taǵy eki aıyptalýshy Folksvagen kóligine kirip, kólik ishinen uıaly telefony urlap ketken. Kelesi kúni aıyptalýshy top kámeletke tolmaǵan qyzdy zorlaǵan.
Sottyń málimetinshe, sotqa tartylǵandardyń tórteýi - kámeletke tolmaǵandar.
«Sottalýshylardyń kinási sotqa deıingi tergep-tekserý barysynda bergen aıǵaqtarymen, jábirlenýshiler men kýálardyń aıǵaqtarymen, oqıǵa bolǵan jerdi qaraý, bettestirý hattamalary, tergeý áreketterin júrgizý kezinde kámeletke tolmaǵandardan jaýap alý hattamalarymen dáleldendi», – dedi sot.
Sottalýshylar óz kinálaryn moıyndamady.
Sot basty aıyptalýshyny 20 jylǵa bas bostandyǵynan aıyrdy. Taǵy ekeýi 7, 6 jyl jaza aldy. Taǵy ekeýi 8 jylǵa bas bostandyǵynan aıyryldy.
Buǵan deıin Oralda 16-17 jas aralyǵyndaǵy tórt jasóspirim men 20 jastaǵy jigitke qatysty sot proesi ótip jatqany habarlanǵan bolatyn. Olar 12 jastaǵy qyzdy zorlady degen aıyppen, bir jylǵa jýyq ýaqyt buryn ustalǵan.
Prokýror kúdiktilerdiń kinási dáleldengenin aıtty.
Alaıda jábirlenýshi dep tanylǵan 12 jastaǵy qyzdyń anasy sottalýshylardy aqtaýdy surady. Ol qyzynyń ótirik aıtqanyn, zorlanbaǵanyn aıtady.
