Qazirgi kezeńdegi strategııalyq mindetterdiń biri – Aýǵanstandy óńiraralyq baılanystarǵa belsendi tartý. Bul týraly UQShU-ǵa múshe elder parlamentteri palatalarynyń spıkerlerimen kezdesýde Qasym-Jomart Toqaev aıtty, dep habarlaıdy “Adyrna” ulttyq portaly.
«Qazaqstan tálibter rejımin terrorlyq uıymdar tiziminen alyp tastady. Óıtkeni qazirgi Aýǵanstanmen saýda-ekonomıkalyq yntymaqtastyqty damytý mańyzdy ári búgingi rejım uzaqmerzimdi faktor bolady dep oılaımyz», – dedi Memleket basshysy.
Prezıdent bul máselede UQShU-ǵa múshe elderdiń ózara kelisilgen ustanymy bolýy kerek ekenine nazar aýdaryp, Almatyda Ortalyq Azııa men Aýǵanstan úshin Ornyqty damý maqsattary jónindegi aımaqtyq ortalyq qurý týraly Qazaqstannyń bastamasyn qoldaýǵa shaqyrdy.
Qasym-Jomart Toqaev qazirgi zamannyń syn-qaterlerine qarsy áreket etý júıesin jetildirý qajet ekenin eskere otyryp, UQShU kúsh-jigerin uıym jarǵysyna sáıkes múshe-memleketter úshin barynsha ózekti ári tıisti jumys baǵyttaryna jumyldyrýdy usyndy. Qazaqstan atalǵan mindetterdi Uıymǵa tóraǵalyq etý kezeńinde basym baǵyt retinde belgiledi. Atap aıtqanda, Prezıdent terrrorlyq qaýip-qatermen kúresý jáne UQShU-ǵa múshe elder azamattarynyń qaýipsizdigin qamtamasyz etý úshin pármendi sharalar qabyldaý qajet dep sanaıdy.
Aıta keteıik, búgin Memleket basshysy UQShU-ǵa múshe elder parlamentteri palatalarynyń spıkerlerimen kezdesti.
