Aqtaý jáne Quryq portynda iri teńiz kóliktik-logıstıkalyq klasteri qurylady, dep habarlaıdy “Adyrna” ulttyq portaly 24KZ-ke siltep.
Quryq parom kesheni arqyly Ázerbaıjanǵa munaı, metall, dándi daqyldar tasymaldanady. Ótken jyly ártúrli júkterdi aýystyryp tıeý kólemi 2 mln tonnadan asty. Bıyl jyl basynan beri 700 myń tonnadaı júk ótken. Transkaspıı halyqaralyq kólik baǵytyn damytý boıynsha portta aýqymdy jumys júrip jatyr. Sonyń biri – teńiz túbin tereńdetý. Sondaı-aq qosymsha aılaqtar salý kún tártibinde tur.
«Qazirgi ýaqytta túbin tereńdetý jumystaryn júrgizetin kompanııa anyqtaldy. Bul – osy saladaǵy kóshbasshy «Ian de Nýl» kompanııasy. Atalǵan jumystar maýsym aıynda bastalyp, jumystar porttyń barlyq akvatorııasynda júrgiziletin bolady. Bul port akvatorııasynda qosymsha 5 aılaq qurýǵa múmkindik beredi», - «Quryq» teńiz portynyń sektor bastyǵy Aıtqalı Nurmaǵanbetov.
Bıyl Quryq portynda jańa termınaldy iske qosý josparlanǵan. Nysan jylyna 1 mln tonna astyq saqtap, jóneltýge qaýqarly. Budan bólek, 8 aılaqtyń qurylysy bastalmaq. Bul sý aılaǵy aýmaǵynda júk tıeý alańyn 220 gektarǵa deıin ulǵaıtýǵa múmkindik beredi. Al Aqtaý teńiz portynda konteınerlik hab qurylysyn 2025 jyldyń sońyna deıin aıaqtaý kózdelip otyr. Birlesken joba quny – 43 mlrd 462 mln teńge.
«Qazirgi ýaqytta korporatıvtik is-sharalar júrgizilip jatyr. Konteınerlik hab – birlesken joba. Ony Aqtaý teńiz saýda porty, qazaqstandyq mýltımodaldyq logıstıka kompanııasy men qytaılyq «Lıanıýngan» porty júzege asyrady. Hab Aqtaý sý aılaǵy arqyly 2025 jyly 92 myń, al 2034 jyly 200-300 konteıner qabyldap, jóneltýge múmkindik beredi dep josparlanǵan», – «Aqtaý teńiz saýda porty» UK» AQ kólik-logıstıka bóliminiń jetekshi mamany Talǵat Nagýmanov.
Kaspıı deńgeıiniń túsýi qazaqstandyq porttardyń keme qabyldaýyna keri áser etti. Aqtaý portynda da teńiz túbin tereńdetý qolǵa alyndy. Geologııalyq barlaý jasalyp, jobalyq-smetalyq qujaty ázirlenip jatyr. Eń bastysy, port jumys qýatyn joǵaltqan joq. Bıyl qańtar-sáýir aılary 1 mln 541 tonnadan astam ártúrli júk ótkizdi. Sonyń 1 mln 248 myń tonnasy – munaı ónimderi. Al 2023 jyly jalpy kólemi 4 mln 483 myń tonna bolatyn júkter aýystyryp tıelgen.
