Qyrǵyzstan keden qyzmeti basshysynyń burynǵy orynbasary Raıymbek Matraımovqa qatysy bar depýtattar qyzmetinen bosatyldy. Bul týraly eldiń ulttyq qaýipsizdik jónindegi memlekettik komıtetiniń tóraǵasy Qamshybek Tashıev aıtty, dep habarlaıdy «Adyrna» tilshisi «AKIpress»-ke silteme jasap.
«Jogorký Keneshti «tazalaý» aıaqtaldy. Endi parlamentte jemqor sheneýnikpen keden arqyly qyzmettes bolǵan nemese ortaq bıznes jasaǵan adamdar joq»,—dedi ol.
Jogorký Keneshtiń VII shaqyrylymynyń jumysy barysynda 18 depýtat ártúrli sebeppen óz mandatyn tapsyrdy. Alaıda olardyń arasynda qaı saıasatkerdiń Raıymbek Matraımovpen istes bolǵany belgisiz.
Bir aı buryn Qyrǵyz UQK basshysy el parlamentin jemqor depýtattardan tazartýǵa ýáde bergen bolatyn.
«Parlamentke halqyna qyzmet etýge daıyn adamdar, óz eliniń patrıottary kelýi kerek», - dedi Qamshybek Tashıev
Eske salaıyq, 2024 jylǵy qańtardyń aıaǵynda Raıymbek Matraımovqa Ulttyq qaýipsizdik komıteti izdeý jarııalap, onyń mıllıardtaǵan somdyq jyljymaıtyn múlki memleket menshigine ótkizildi.
