Memleket basshysy Qasym-Jomart Toqaev Reseı hokkeı federaııasynyń prezıdenti Vladıslav Tretıakty qabyldady. Bul týraly Aqorda jarııalady, dep habarlaıdy “Adyrna” ulttyq portaly.
Prezıdent Qasym-Jomart Toqaev sońǵy jyldary Qazaqstanda hokkeı sportynyń aýqymy aıtarlyqtaı keńeıgenin atap ótti. Memleket basshysynyń pikirinshe, elordalyq «Barys» klýby bastaǵan otandyq komandalardyń QHL chempıonatyna jáne basqa da týrnırlerge qatysýy, sondaı-aq ulttyq quramanyń álemdik birinshilikterde tabysty óner kórsetýi atalǵan sport túrin keńinen dáripteýge oń yqpal etedi. Atap aıtqanda, Qazaqstanda hokkeı mektepteri men jastar komandalary kóbeıip, túrli deńgeıdegi jarystar belsendi uıymdastyryla bastady.
Óz kezeginde Vladıslav Tretıak qonaqjaılyq tanytqany jáne Astanada ótip jatqan «Qazaqstan Hockey Open 2024» halyqaralyq týrnıriniń joǵary deńgeıde uıymdastyrylǵany úshin rızashylyǵyn bildirdi. Sondaı-aq ol Qazaqstan hokkeıiniń ókilderi edáýir tabysqa jetkenine nazar aýdaryp, mundaı jetistik sporttyń komandalyq túrlerine memleket tarapynan laıyqty deńgeıde mán berilýiniń nátıjesi ekenin aıtty.
