Ulttyq statıstıka bıýrosy qazaqstandyqtardyń esimderi men tegine qatysty 2021 jylǵy sanaq qorytyndysy boıynsha derekterdi usyndy, dep habarlaıdy “Adyrna” portaly kaz.inform saıtyna siltep.
2021 jylǵy sanaq kezinde Qazaqstanda Azamat esimdi 63 myń er adam jáne Arýjan esimdi 73 myń áıel turǵan. Jarııalanymdaǵy derekterge sáıkes, 10 retten kóp kezdesetin 33 myńnan astam esim jáne 100-den astam ret kezdesetin 29 myń tektiń bary anyqtaldy.
Sondaı-aq, elektrondy kestede qazaqtardan keıin Qazaqstanda kóp dep sanalatyn orys jáne ózbek ultynyń tanymal esimderi men tekteri kórsetilgen.
10 000-nan astam ret 136 er jáne 146 áıel esimderi kezdesedi.
Osylaısha, er adamdar arasynda eń tanymal esimder Azamat (63 myń adam), Serik (53 myń adam), Marat (50 myń adam), áıelderde — Arýjan (73 myń adam), Madına (59 myń adam), Dınara (59 myń adam) boldy.
Erler men áıelder arasynda bir mezgilde tanymal bolǵan esimder — Baqyt pen Sáýlet. Erlerge de, áıelderge de tán esimderi bar adam sany — 585 myń.
Qazaq er esimderine eń kóp jalǵanǵan sózder — «baı», «bek», «jan», «han» boldy.
«Bek» ótken ǵasyrda óte tanymal bolǵanymen, 2000-shy jyldardan keıin báseńdeı bastady.
Bul rette quramynda «han» sózi bar esimder sońǵy 30 jyl boıy turaqty túrde ósim kórsetip keledi.
Áıel esimderinde eń jıi kezdesetin «gúl» sózi 1950 jyldardan bastap 2000 jyldarǵa deıin óte tanymal bolǵan.
Elektrondyq keste derekterine sáıkes, qazaqtardyń qysqa esimderdi kóbirek unata bastaǵanyn da baıqaýǵa bolady.
Bir qyzyǵy, 70-80 jyldardy qospaǵanda erlerdiń esimi áıelderdikinen uzaǵyraq bolǵan.
Qazaqstanda 10 000-nan astam ret 69 qazaq tegi kezdesedi.
Osylaısha, qazaqtyń alǵashqy tekter úshtigine Ahmetov (56 myń), Serik (39 myń), Omarov (36 myń) kirip otyr.
Qazaqtar arasynda -ov, -ev, -ın (-ova, -eva, -ına) jalǵaýlaryna aıaqtalǵan tekter úlesi 64 paıyzdan aspaıdy.
Alaıda, ár jyly týǵandardyń tekterin taldasaq, atalǵan jalǵaýlary bar tekter úlesiniń azaıý dınamıkasyn baıqaýǵa bolady.
Sondaı-aq dıagrammaǵa qarap, kóptegen qazaqstandyqtyń ákesiniń aty degende -vıch, -vna jalǵaýlarynan góri -uly/-qyzy degenge kóship jatqanyn kórip otyrmyz.
Sondaı-aq Qazaqstanda atymen de, tegimen de attas azamattar sany az emes.
Osy rette Serik Ahmetov (415) pen Aızere Serik (517) degen esimi men tegi birdeı adamdar eń kóp.
