El mektepterinde 25 mamyr kúni sońǵy qońyraý soǵylatyn boldy, dep habarlaıdy "Adyrna" ulttyq portaly.
Oqý-aǵartý mınıstri Ǵanı Beısembaev mektep túlekterine úndeý jasady.
"Bıylǵy oqý jyly 25 mamyrda aıaqtalatyndyǵyn qatań eskertemin. Osyǵan oraı, oqý baǵdarlamalaryn jyl boıyna tabysty meńgergen 3,8 mıllıonnan astam elimizdiń oqýshylary, kelesi synyptarǵa kóshirilsin. Mekteptiń 1-10 synyp oqýshylaryna "Bilimim Otanyma" taqyrybyndaǵy Biryńǵaı synyp saǵattaryn ótkizý 24 mamyr juma kúnine josparlansyn. Bul byltyrǵy jyldyń qyrkúıek aıynda engizilgen "Birtutas tárbıe baǵdarlamasy" sheńberinde qabyldanǵan josparǵa sáıkes uıymdastyrylýy tıis. Áriptesterimizdiń usynysy boıynsha elimizde mamyr aıynda - "Yntymaq aıy" aılyǵyn ótkizý josparlanǵan. Onyń aıasynda "Taza Qazaqstan", "Igi ister", "Kanıkýlda kitap oqıyq" jáne t.b. sharalar qarastyrylǵan", - deıdi mınıstr. Sonymen qatar, Ǵanı Beısembaev elimizdegi 186 myń mektep bitirýshileri úshin oqý jylynyń aıaqtalýyna arnalǵan "Sońǵy qońyraý" is-sharasyn 25 mamyrda ótkizýdi tapsyrdy. "Bıylǵy túlekter atalǵan is sharany joǵary mádenıettilikpen, ysyrapshyldyqsyz, dańǵazalyqsyz, rýhanı-adamgershilik deńgeıinde ótkizetindikterine senimdimin. Bul bolashaq túlekter úshin ónegeli dástúrge aınalǵan jańa formattaǵy joǵary mádenıetti alǵashqy shara bolary sózsiz. Oqý jylyn aıaqtaýdy sapaly uıymdastyrý jáne qaýipsizdik sharalaryn saqtaý boıynsha óńirlik bilim basqaramalarynyń basshylaryna derbes jaýapkershilik júkteımin", - deıdi mınıstr.
