Jambyl oblysynda 111 mıllıon teńgege salynǵan sport zal qańyrap bos tur, dep habarlaıdy "Adyrna" ulttyq portaly "Habar 24"-ke siltep.
Jańa jyl qarsańynda Jýaly aýdany Káriqorǵan aýylyndaǵy sport zaly saltanatty túrde kópke tanystyrylǵan. Dene shynyqtyrý mekemesi ondaǵan jyl qaraýsyz qalǵan ǵımarattan ashylyp edi. Onyń qurylysyna "Aýyl – el besigi" baǵdarlamasy boıynsha 111 mıllıon teńgeden astam qarjy jumsalǵany belgili boldy. Degenmen ǵımaratty tekseris kezinde jóndeý sapasyz júrgizilgeni anyqtaldy.
“Bul sport keshenin qalpyna keltirý jumystary nashar júrgizildi. Jobalyq-smetalyq qujattamany tekserip, sporttyq qural-jabdyq qamtamasyz etilmegenin anyqtadyq. Tapsyrys berýshiniń aıtýynsha, olar sporttyq qural-jabdyqtardy Jambyl oblysynyń dene shynyqtyrý basqarmasy ýáde etkenin aıtady”, – dedi Jýaly aýdandyq qoǵamdyq keńesiniń múshesi Talǵat Qýatbekov.
Qurylystyń sapasyz bolǵanyn aýyl turǵyndary da aıtýda.
“Basynda smetany qate qurastyrdyq dedi. Káriz júıesi tartylmaǵan, jarty jolda tastap ketken. Tarazdan komıssııa kelip, osy kemshilikterdiń barlyǵyn anyqtady. Ǵımarat kúzetilmeıdi. Ol budan bylaı bos qtura berse, joıylady.”, – dedi Káriqorǵan aýylynyń turǵyny Dáýren Úsipbekov.
Ǵımaratta sylaq qulap, qoqys shashylyp, jaryqsyz qalǵan. Al jabdyqtalmaǵan bos bólmeler sol kúıi qalyp ketken. Aýdandyq sport bólimi basshysynyń aıtýynsha, aýa raıynyń qolaısyzdyǵynan ǵımaratty qalpyna keltirý jumystary keıinge qaldyrylypty. Bul nysandy sport bólimi baqylaýǵa alýy kerek bolǵan, degenmen áli oryndalmaǵan.
Qoǵamdyq keńes barlyq kemshilikterdi kepildikpen merdiger joıatynyn aıtady. Jergilikti bılik shtat jasaqtap, bıýdjettik ótinim berýdi josparlap otyr. Aýdandyq máslıhat maquldasa, bir aıdan keıin sport zaly ashylady dep kútilýde.
