Qurmanǵazy atyndaǵy Qazaq ulttyq konservatorııasynan kútpegen jerden shý shyqty, dep habarlaıdy "Adyrna" ulttyq portaly.
Óner ordasyndaǵy daýdyń basy – rektorlyq laýazym. Qurmanǵazy atyndaǵy Qazaq Ulttyq konservatorııasyna 2023 jyldyń qarasha aıynda ǵana joǵary jaqtan arnaıy jetken basshylyq Rektordyń ýaqytsha mindetin atqaratyn Núrken Ashırovty ujymǵa tanystyryp, aldaǵy jumysyna sáttilik tilep, taǵaıyndap ketken. Jańa rektordy konservatorııa ustazdary men stýdentteri ǵana emes, kúlli respýblıka jurty asqan qýanyshpen qabyldaǵanynyń aıǵaǵy áleýmettik jelide biraz ýaqyt esip turdy.
Alaıda, araǵa bes aı ótpeı osy jerge rektorlyqqa konkýrs ótkizilip, basqa rektor keletini týraly málim bolady. Eń jumbaǵy – ol konkýrsqa Ashırovtyń qatystyrylmaı qalǵandyǵy. Másele “barmaq basty, kóz qystymen” sheshildi dep eseptegen konservatorııanyń birqatar professorlary men Halyq artısteri Qazaqstan Respýblıkasy Prezıdenti Q.Toqaevtyń atyna Ashyq hat ta jóneltipti.
Aryzdanýshydar “Konkýrs qalaı ótken? Nege Ashırov qatystyrylmaǵan?”, “Konservatorııa – ónerdiń qara shańyraǵy. Ujym pikirimen nege sanaspaıdy?”, “Jańadan keletin G.Tasbergenova kim? Óner, bilim salasynda qandaı eńbek sińirgen?”, “N.Ashırov syndy azamattarymyzdy esh sebepsiz qashanǵy ysyryp tastaı beremiz?” degen sarynda talap-aryzdaryn jetkizgen.
Múıizi qaraǵaıdaı kil myqtylar shoǵyrlanǵan, talaı ulylardyń tabany tıgen konservatorııa qyzmetkerleri men óner adamdary kópshilikke beımálim, tájirıbesinde memlekettik mekeme basqaryp, qyzmet barysynda óz-ózin áli esh jerde dáleldep úlgermegen mamannyń osy jerge basshylyqqa kele jatqanyn estigende daýryqqanyn aıtady.
"Konservatorııa – respýblıkanyń óner salasyndaǵy eń beldi, bedeldi bilim ordasy. Kez kelgen adamdy basshylyqqa keldi dep qoshemettep qarsy ala qoıatyn eleýsiz mekeme emes. Múıizi qaraǵaıdaı kil myqtylar shoǵyrlanǵan, talaı ulylardyń tabany tıgen, A.Jubanov, Q.Qojamıarov, E.Rahmadıev, Ǵ.Jubanova, J.Áýbákirova syndy myqtylar basqarǵan kıeli de qasıetti shańyraq. Aty kópshilikke beımálim, tájirıbesinde memlekettik mekeme basqaryp, qyzmet barysynda óz-ózin áli esh jerde dáleldep úlgermegen mamannyń osy jerge basshylyqqa kele jatqanyn estigen ujym ustazdarynyń ábigerge salynyp daýryǵýy da zańdylyq. Árkim óziniń azamattyq pikirin ashyq bildirýge de, jarııalaýǵa da quqyly. Olarda aıyp joq. Bizge kim kelse de eńbegi sińgen, ózin moıyndatqan aty dardaı, durys basshy kelse eken degen tilek olardiki", - deıdi alańdaýshylar.
Rektordyń aýysýyn "orynsyz" dep sanaıtyndar beıbereket, sebepsiz aýys-túıis mekemeniń damý proesine de áser etetinin aıtady.
"Buryn “Ulttyq” statýsty oqý oryndaryna Rektordy tikeleı QR Prezıdenti saraptan ótkizip, óz Jarlyǵymen taǵaıyndaıtyn. Ol kezde mundaı suraqtar týyndamaıtyn. N.Ashırov kósheden kelgen kók atty emes! Ónerdiń óz qazanynda qaınap, ábden pisip jetilgen maman. Kóp jyldar ár jerde jetekshilik, meńgerýshilik, basshylyq qyzmetter de atqarǵan. Endeshe, nege osyndaı tájirıbeli jetekshige jumys isteýge múmkindik berilmeı otyr? Konkýrstan nege shettetildi? Ony jyly ornynan qozǵap munda nege alyp keldi? Sebep ne? Suraq kóp. Jańa Qazaqstan, Ádiletti Qazaqstan quramyz desek ashyqtyq pen jarııalylyq kerek. Kadr irikteý, basshylyqqa taǵaıyndaý isterinde Prezıdent aıtqan merıtokratııa, ıaǵnı, eshqandaı áleýmettik shyǵý tegi men qarjylyq áleýetine táýelsiz, ózin isimen dáleldegen tájirıbeli mamanǵa múmkindik berilýi kerek.
N.Ashırov – QR eńbek sińirgen qaıratkeri, QR Memlekettik stıpendııa ıegeri, Halyqaralyq konkýrstardyń laýreaty, kompozıtor, dırıjer, kúıshi. A.Jubanov atyndaǵy daryndy balalarǵa arnalǵan Respýblıkalyq mýzyka mektebiniń dırektory (2019-23), Bólim meńgerýshisi (2012-18), Qurmanǵazy atyndaǵy Qazaq ulttyq konservatorııasynyń fakýltet dekany (2018-19), N.Tilendıev at. Akademııalyq orkestrdiń bas konertmeısteri (2004-10) sııaqty basshylyq, jetekshilik qyzmette 20 jylǵa jýyq tájirıbesi bar maman. Kóptegen memlekettik is sharalardyń qatysýshysy, jobalar avtory ári jetekshisi.
G. Tasbergenova – Art-menedjment mamandyǵy boıynsha PhD. “Rýhanı qazyna” ofıs-shtabynyń jetekshisi. Biliktiligin birqatar memlekettik, halyqaralyq jobalardyń avtory ári uıymdastyrýshysy retinde kórsetken. Aýystyrylyp, ornynan bosap jatqan mekeme basshylary barshylyq, biraq dál myna jaǵdaı “joǵarydaǵylarǵa” oı salýy kerek. Qazir jaǵdaı basqa, zań da basqa, zaman da basqa.
Tájirıbesi men biliktiligi ártúrli eki mamandy esh sebepsiz aýystyrý, bir-birine qarsy qoıý “joǵaryǵa” ne úshin qajet boldy eken? N.Ashırov nesimen jaqpaı qaldy?", - dep ashynýda jurt.
Osylaısha Memleket basshysy men Úkimet basshysyna da ashyq hat joldaǵan.
Qurmetti Qasym-Jomart Kemeluly!
Qurmanǵazy atyndaǵy Qazaq ulttyq konservatorııasy respýblıkamyzdaǵy kásibı mýzyka mamandaryn daıyndaıtyn biregeı joǵary oqý orny – jalǵyz konservatorııa. Atalǵan oqý ornynyń respýblıkamyzǵa ǵana emes álemge tanymal talaı túlekter shyqqanyn jaqsy bilersiz. KSRO halyq artısteri B. Tólegenova, A. Áshimov, Á. Dinishev, t.b. jáne QR halyq artısteri N.Núsipjanov, E. Hasanǵalıev, B. Jylysbaev, R.Jamanova, B. Jamanbaev, S. Orazbaev, K.Kúmisbekov, S. Muhamedjanov, E. Obaev, S.Tynyshtyǵulova, Á. Esqalıev, Q. Ahmedııarov, A.Qorazbaev, T. Jamanqulov, Q.Baıbosynov, T. Muhamedjanov, D. Joljaqsynov, T. Temenov, Ǵ. Moldakarımova, T.Shámelov, Sh. Abılov, A. Úlkenbaeva, R.Stamǵazıev, T. Kúzembaev, t.b. júzdegen QR eńbek sińirgen qaıratkerleri, t.b. akademık, doktorlar, professorlar osy shańyraqtyń túlekteri ári maqtanyshtary. Qazaq eliniń mýzyka mádenıetiniń joǵary deńgeıde damýy dál osy konservatorııanyń túlekteriniń arqasy.
Sońǵy 5 jyl konservatorııany basqarǵan Arman Júdebaevtyń jetekshiligi kezinde halyqaralyq deńgeıde úlken jetistikterge jetti. Konservatorııamyz 75 jyldyq tarıhynda alǵash ret kúrdeli jóndeý jumystaryn júrgizip, ǵımarattarymyz, aýdıtorııalarymyz jańasha túrlenip, jańǵyryp sala berdi. Jemisti de jeńisti jumystarynyń nátıjesinde A. Júdebaev mınıstrlikke shaqyrtý alyp, onda da biraz tushymdy sharýalar atqarýǵa sep boldy. Biraq belgisiz sebeppen osy jyldyń aqpan aıynda T. Júrgenov atyndaǵy Qazaq ulttyq óner akademııasyna rektorlyqqa aýystyryldy.
Al, osy kezeńde bizdiń konservatorııaǵa Rektormindetin ýaqytsha atqarýshy bolyp Nurken Nurǵalıuly Áshirov taǵaıyndaldy. N. Áshirov – QR eńbek sińirgen qaıratkeri, kúıshi, kompozıtor, dırıjer. Asa talantty mýzykant, qazaq mýzyka mádenıetin, ásirese, dombyra aspabyn, kúı ónerin álemniń ataqty sahnalarynda tanytqan biregeı talant, elimizdiń brendi atanǵanbizdiń maqtanyshymyz! Onyń jas ta bolsa qazaq mýzyka mádenıetiniń damýyna qosqan úlesi orasan zor.
N. Áshirov osy konservatorııada ustaz, orkestr dırıjeri, fakýltet dekany qyzmetterin atqaryp, óz qazanynda qaınaǵan, ár istiń mán-jaıyna ábden qanyq, ishten shyqqan kadrymyz. Ol osyǵan deıinA. Jubanov atyndaǵy Respýblıkalyq daryndy balalarǵa arnalǵan mýzyka mektep-ınternatynyń dırektory qyzmetin 2019-2023 jyldary joǵary deńgeıde abyroımen atqarǵan óte bilikti basshy. Onyń aldynda da 2003-2010 jyldary N. Tilendıev atyndaǵy AFEO bas konertmeısteri, solısti, 2010-2018 j.j. A.Jubanov atyndaǵy Respýblıkalyq mýzyka mektebiniń ustazy ári bólim meńgerýshisi, qosymsha 2011-2018 jyldary Jambyl atyndaǵy Qazaq memlekettik fılarmonııasynyń solısti qyzmetterin atqarǵan bilikti maman.
Mádenıet jáne aqparat mınıstri Aıda Balaeva 2023 jyldyń qarasha aıynda N. Áshirovty konservatorııaǵa Rektor mindetin ýaqytsha atqarýǵa taǵaıyndaǵanda búkil ujym bolyp qatty qýanǵan edik.
Alaıda, osy jyldyń Naýryz aıynda osy Mádenıet jáne aqparat mınıstrligi Egemen Qazaqstan gazetiniń 13 naýryzdaǵy sanyna rektorlyq qyzmetke konkýrs jarııalady, konkýrsqa bir ǵana (!) kandıdat – Gaýhar Tasbergenovaqatystyrylyp, sol kandıdat aldaǵy ýaqytta rektor bolyp kelmekshi eken. Alaıda osy konkýrsqa N. Áshirov belgisiz sebeptermenqatystyrylmaı qalǵan! Ony A. Jubanov atyndaǵy Respýblıkalyq daryndy balalarǵa arnalǵan mýzyka mektep-ınternatyna qaıtadan dırektorlyqqa jiberilip jatyr degendi estip jatyrmyz.
Bıyl konservatorııamyzǵa 80 jyl tolyp otyr. Alda josparlanǵan jáne atqarylar sharýalar kútip tur. Bizge osy kezeńde turaqtylyq kerek!
Rektordyń aýystyrylyp jatqanyn estip, bizder – konservatorııa ujymynyń birqatar professorlyq-oqytýshy quram únsiz qalýdy jón kórmedik. Jańadan taǵaıyndalǵaly otyrǵan G.Tasbergenova da bizdiń konservatorııanyń túlegi. Byltyr 2023 jyly konservatorııadan doktorlyq dıssertaııa jazyp, Fılosofııa doktoryn (PhD) qorǵap shyqty. Kandıdat G. Tasbergenovanyń kelýine eshqandaı qarsylyq bildirip otyrǵan joqpyz.
Degenmen, onyń ujym jáne memlekettik mekemeni basqarýda asa tájirıbesi joq ekenin eskersek, N. Áshirovtyń osy ýaqytqa deıin basshylyq qyzmetterde óz isine adal, ádil, talapshyl, jańashyl, bilikti, isker, myqty maman retinde áldeqashan dáleldegenin eskersek, bul kadrlyq rotaııa ne úshin qajet boldy eken degen kókeıimizde úlken saýal men kúdik týyndap otyr?!
Qurmetti, Qasym-Jomart Kemeluly! Sizdiń árbir bastamalaryńyz ben usynystaryńyzdy konservatorııa ujymy árdaıym asa qyzyǵýshylyqpen tyńdap, ári qoldaıdy. Jańa Qazaqstan, Ádiletti Qazaqstan quramyz dep biz de bolashaqqa zor úmitpen qadam basyp kelemiz. Súıikti otanymyz bolashaqta álemniń aldyńǵy qatarly elderiniń qataryna qosylaryna senemiz jáne soǵan ózimiz de bar kúsh-jigerimizdi jumsap, aıanbaı qyzmet etip kelemiz! Tek keıde el men bılik arasyndaǵy osyndaı túsinispeýshilik, keleńsizdiksaldary halyqtyń, biz sııaqty qarapaıym eldiń senimine selkeý túsirip, Sizge, Siz basqarǵan, taǵaıyndaǵan Úkimetke, Úkimet múshelerine degen senimin joǵaltyp ala ma dep te oılaımyz.
Bul hatty jazýdaǵy saýalymyz:
Qurmetti, Qasym-Jomart Kemeluly! Qazaq óneriniń mýzyka qara shańyraǵy, Qurmanǵazy atyndaǵy Qazaq ulttyq konservatorııasy ujymynyń atynan Sizge bizdiń mekemeniń taǵdyryn tálkekke túsirmeýge tikeleı nazar aýdarýyńyzdy suraımyz! Elimiz ishi daýdan, syrty jaýdan aman bolsyn!
