M.Áýezovtiń qyrǵyz tilindegi latyn árpimen jazylǵan «Kók qasqyr» shyǵarmasy tabyldy, dep habarlaıdy "Adyrna" ulttyq portaly Egemen.kz saıtyndaǵy materıalǵa siltep.
Frýnze qalasyndaǵy «Kırgosızdat» tıpografııasynan 10.000 danamen jaryqqa shyqqan 35 bettik shyǵarma 1928 jyly jarııalandy. Bul týraly A.Qusaıynov atyndaǵy Eýrazııa gýmanıtarlyq ınstıtýtynyń doenti, fılologııa ǵylymdarynyń kandıdaty Laýra Dáýrenbekova bylaı jazdy:
"2023 jyldyń kúz aıynda Ál-Farabı atyndaǵy Qazaq ulttyq ýnıversıtetiniń doenti, fılologııa ǵylymdarynyń kandıdaty Erkingúl Soltanaeva ekeýmiz ǴJBM Ǵylym komıteti qarjylandyratyn AR19679312 «Alash qaıratkerleriniń aýdarma eńbekterindegi adamzatqa ortaq qundylyqtar» ǵylymı jobasy aıasynda issaparmen Qyrǵyzstan Respýblıkasynyń Memlekettik Ortalyq arhıvine baryp, atalǵan arhıvten M.Áýezovtiń qyrǵyz tilindegi latyn árpimen jazylǵan «Kók qasqyr» shyǵarmasyn kezdestirgen edik" deıdi ol.
Kitaptyń artynda qyrǵyz tilinde qoljazba da tirkelgen. Laýra Dáýrenbekova bastapqyda bul shyǵarmany M.Áýezovtiń «Kókserek» shyǵarmasynyń qyrǵyz tilindegi aýdarmasy dep oılap qalǵan. Alaıda:
"Kitaptyń muqabasynda «M.Aýezov. Seryı volk. Detskıı rasskaz. Na kırgızskom ıazyke» dep berilipti. Kitaptyń artyna shyǵarmanyń qyrǵyz tilindegi qoljazbasy birge tirkelgen. Biraq qyrǵyz tiline kimniń aýdarǵany jazylmaǵan. Kitap qyrǵyz tilinde bolǵandyqtan, asyqpaı tanysýymyz kerek boldy. Basynda bul shyǵarmany M.Áýezovtiń «Kókserek» shyǵarmasynyń qyrǵyz tilindegi aýdarmasy dep oıladyq. Keıin tanysa kele, múlde basqa shyǵarma ekenine kózimiz jetip, M.Áýezovtiń barlyq shyǵarmasyn qaıta qarap shyqtyq" dep jazdy ol.