Áleýmettik jelide elimizdiń 10 oqýshysy Reseı anneksııalap alǵan Qyrymǵa 24 kúnge jiberilgeni qyzý talqylanǵan bolatyn. Astanadaǵy «Orys úıi – Rossotrýdnıchestvo» uıymdastyrǵan sharaǵa Astana, Taraz jáne Shymkent qalalarynyń oqýshylary barǵan. Al Oqý-aǵartý mınıstrligi jarysqa qatysý jáne saıahat – ata-ananyń qalaýymen jáne olardyń kelisimimen bolǵanyn aıtyp, aqtaldy.
Soǵys júrip jatqan aımaqta balalarǵa qaýip tónse, oǵan kim jaýap beredi? Osy jáne ózge de suraqtardy Májilis depýtattarynan suradyq.
SURAQQA SURAQPEN JAÝAP BERETIN DEPÝTAT
«Amanat» partııasynyń atynan Májilis depýtaty bolyp saılanǵan Maqsat Tolyqbaıdan «Reseı basqynshylyǵyndaǵy Ýkraına jerine balalardyń barýy qanshalyqty durys?» dep suradyq.
- Basqasyn aıtpaǵanda, Soltústik Qazaqstan oblysyndaǵy sońǵy jaǵdaılardy bilesizder. «Internaıonaldyq erkin halyqpyz» dep ózderin jarııalaǵan oqıǵany kórip otyrmyz. Mundaı pıǵyldaǵy toptar bar. Ulttyq qaýipsizdik komıteti mundaı jaǵdaıda jaqsy jumys isteýi kerek, – dedi depýtat alystan oraǵytyp.
Máseleni taǵy da naqtylaı túsý úshin «Soǵys aımaǵyndaǵy Qyrymǵa oqýshylardy jibergeni úshin kim jaýap berýi kerek?» dep suradyq.
- Oǵan baılanysty mende de suraq bar. Soǵys bolyp jatqan aımaqqa oqýshylardy nege jiberedi? Kim ruqsat bergen? Kimniń qaýlysymen qabyldaǵan sheshim. Bir adam osyǵan baılanysty jaýapkershilikke tartylýy kerek, - dedi depýtat taǵy da naqty jaýaptan taısaqtap.
MINISTRDIŃ ADVOKATYNDAI DEPÝTAT
«Respýblıka» partııasy arqyly depýtat bolǵan Oljas Quspekov bolsa, tipten tańǵaldyrdy. Ol Qyrymǵa oqýshylardy jiberý týraly sheshimdi ata-analar qabyldaǵanyn aıtty.
- Meniń bilýimshe, halyqaralyq konkýrs bolǵan. Sol konkýstyń nátıjesinde balalar júldeli oryn alyp, soǵan baılanysty balalarǵa syılyq retinde Artekke demalys joldamasy berilgen, - deıdi depýtat Quspekov.
Onyń aıtýynsha, qazir Qazaqstanda mundaı ashyq konkýrstar kóp. Oǵan qatysý, qatyspaý balanyń áke-sheshesimen birge aqyldasyp qabyldaıtyn tańdaýy. Bul máselege Oqý-aǵartý mınıstri kirispeıtin sııaqty. Internette bolyp jatqan konkýrsqa oqýshy men ata-ana ózi sheshim qabyldap, qatysady. Júldeli oryn úshin demalys oryndaryna joldama beretin bolsa, oǵan balasyn jiberý, jibermeý – ár ata-ananyń óz sheshimi. Sebebi kámeletke jasy tolmaǵan balalar úshin sheshimdi ata-ana qabyldaıdy. Eger Qazaqstannyń ishindegi olımpıada nemese konkýstar bolatyn bolsa, Oqý-aǵartý mınıstrligi men bilim basqarmalary arnaıy bilim salasynyń adamyn qosady. Ol balanyń tártibi men qaýipsizdigine qaraıtyn bolady.
Balalardyń utysynan góri qaýipsizdigine, jalpy bilim salasyna qatysty basshylardyń roli qandaı bolý keregin suraǵanda, depýtat bylaı dedi:
- Bul jerde bireýdi aıyptaǵan durys emes shyǵar. Ata-analardyń áreketin mınıstrlik bilmeýdi de múmkin. Áıtse de, bul jerdegi qaýipsizdik máselesine mindetti túrde nazar aýdarýymyz kerek. Ata-analardyń tańdaýy arqyly qabyldanǵan sheshim boıynsha Oqý-aǵartý mınıstrligimen eshkim kelisken joq. Biraq balalar bizdiń Qazaqstannyń azamaty bolǵandyqtan memleket oǵan mindetti túrde nazar aýdarý kerek. Alaıda bul máselede mınıstrlikti aıyptaý durys emes.
– Eger Muhtar Áblıazov osyndaı konkýrs uıymdastyryp, balalardy Franııaǵa shaqyrsa, oǵan quzyrly organ jol bere me?
– Meniń bilýimshe, qazir shekteý qoıa almaıdy. Ol siz aıtqan adam bolsyn, nemese Qyrymǵa aparatyn uıym bolsyn. Bul tek ata-ananyń tańdaýyndaǵy sharýa bolyp sanalady. Óıtkeni ınternet ashyq. Áleýmettik jeli arqyly jarııalaǵan konkýrsqa qatysý, qatyspaýdy ata-analar ózderi sheshedi. Bul jerde oqý-aǵartý mınıstrliginiń tikeleı kinási joq.
– Siz mınıstrlikke lobbı bolyp otyrǵan joqsyz ba?
– Joq. Obektıvti pikir bildirip otyrmyn. Qyrymǵa barǵan oqýshylardan bólek jazda neshe túrli lagerler jumys isteıdi. Men ony jaqsy bilmeýim múmkin. Sodan keıin ınternetten izdeımin.
– Siz óz balańyzdy Qyrymǵa demalysqa jiberer me edińiz?
– Joq, jibermes edim.
– Nege?
– Men qazaqy kózqarasta bolǵandyqtan onda jibermeımin, - dedi depýtat Qusbekov.
Biz suraq qoıǵan depýtattar máseleni naqtylamaı, osylaı syrǵytpa jaýappen qutylǵandaı boldy. Baıqaýymyzsha, depýtat myrzalar Qazaqstan oqýshylary Qyrym turmaq, Sýdan men Taıaý Shyǵysqa da baryp jatsa da, qyńq eter túri joq. Jaýaptary «óıtý kerek edi», «búıtý kerek edi» degennen aspaıdy. Kim isteıdi? Partııa qaıda, partııa usynǵan depýtat qaıda?
Áıtpese, álemdik aqparat aıdynynda áne-mine Qyrym Ýkraınaǵa qaıtarylady degen habar taraǵan kezde balalardy soǵys aımaǵyna jiberý dabyldyń úlkeni bolsa kerek edi. Depýtattar mınıstrler men tıisti komıtet ókilderin shaqyryp, jaýapkershilik talap eter edi...
Serik Joldasbaı
"Adyrna" ulttyq portaly
