Älemdık köşbasşylar Armeniia premer-ministrı Nikol Paşiniandy parlamenttık sailaudaǧy jeŋısımen qūttyqtap jatyr. Qūttyqtau joldaǧandardyŋ qatarynda EO elderınıŋ basşylary, Qazaqstan men Ukraina prezidentterı jäne özge de memleket basşylary bar, dep habarlaidy «Adyrna» tılşısı.
«Qūrmettı Nikol Paşinian, sailaudaǧy jeŋısıŋızben qūttyqtaimyn. Bız demokratiialyq Armeniiamen serıktestıktı joǧary baǧalaimyz, ol Europaǧa barǧan saiyn jaqyndap keledı. Armeniia bızge sene alady», – dep jazdy Eurokomissiia töraiymy Ursula fon der Liaien.
Fransiia prezidentı Emmanuel Makron da qūttyqtau joldap, Paşiniandy «senımdı jeŋısımen» qūttyqtady. Ol öz hatynda Erevanmen yntymaqtastyqty nyǧaitu, beibıtşılık pen Armeniianyŋ egemendıgın qoldau jäne Europamen jaqyndasu üderısın bırge jalǧastyruǧa daiyn ekenın bıldırdı.
Ukraina prezidentı Vladimir Zelenskii de Paşinian men onyŋ «Azamattyq kelısım» partiiasyn jeŋısımen qūttyqtady. Onyŋ aituynşa, būl – Armeniia egemendıgı men halyqtyŋ öz jolyn taŋdau qūqyǧynyŋ jeŋısı.
Zelenskii sondai-aq Ukraina yntymaqtastyqty keŋeituge daiyn ekenın aityp, Euroodaqqa Armeniiany naqty qoldauǧa şaqyrdy. Ol būl jaǧdaidy EO üşın synaq dep atap, «uaqytty joǧaltpau maŋyzdy» ekenın eskerttı.
Litva prezidentı Edgars Rinkevichs Paşiniandy «aiqyn jeŋıspen» qūttyqtap, Armeniianyŋ qauıp-qater men qysymǧa qaramastan demokratiialyq joldy taŋdaǧanyn atap öttı. Ol Latviianyŋ Armeniia men EO arasyndaǧy jaqyn qarym-qatynasty qoldaitynyn jetkızdı.
Al Mäskeu Erevandy proreseilık küşterge qysym jasady, EO-ny sailauǧa aralasty dep aiyptady. Resei SIM ökılı Mariia Zaharova Armeniiada Reseimen bailanystardy damytuǧa jäne eldıŋ «euraziialyq integrasiialyq qūrylymdarda» qaluyna sūranys bar ekenıne senım bıldırdı. Onyŋ aituynşa, Armeniia bilıgı Reseimen bailanysty küşeitudı qoldaityn partiialardy ǧana qudalap otyr. Ol armian halqyn «bauyrlas halyq» dep atap, beibıtşılık pen örkendeu tıledı. Sonymen qatar Mäskeu Armeniia ükımetınıŋ naqty äreketterıne qarai saiasatyn aiqyndaitynyn mälımdedı.
Armeniiada 7 mausymda ötken parlamenttık sailauda Paşiniannyŋ «Azamattyq kelısım» partiiasy aiqyn jeŋıske jetken edı. Eldıŋ Ortalyq sailau komissiiasynyŋ mälımetınşe, «Azamattyq kelısım» partiiasy barlyq dauys sanalǧannan keiın jeŋıske jetıp, şamamen 727 myŋ dauys jinaǧan. Būl jalpy dauys sanynyŋ 49,81 paiyzyn qūraidy.
Būǧan deiın prezident Qasym-Jomart Toqaevtyŋ alǧaşqy bolyp Paşiniandı qūttyqtaǧanyn jazǧan edık.
