Almaty oblysynda jalpy qūny 32,5 mlrd teŋge bolatyn farmasevtikalyq zauyt qūrylysynyŋ jobasy maqūldandy. Būl turaly bügın, 25 mamyrda Ükımettıŋ baspasöz qyzmetı jazdy, dep habarlaidy «Adyrna» tılşısı.
«Elımızde Memleket basşysynyŋ tapsyrmalaryna säikes, otandyq därılık zattar öndırısınıŋ ülesın arttyruǧa baǧyttalǧan jobalardy jüzege asyru jalǧasyp jatyr. Atalǧan jūmys aiasynda Qazaqstan Respublikasynyŋ Ükımetı Densaulyq saqtau ministrlıgı men «Steppe pharmaceuticals» JŞS arasynda jasalǧan Almaty oblysyndaǧy «Alatau» AEA aumaǧynda tolyq sikldı biofarmasevtikalyq keşen salu jönındegı investisiialar turaly kelısımdı maqūldady. Premer-ministr Oljas Bektenov tiıstı qaulyǧa qol qoidy»,–delıngen habarlamada.
Jeke investisiialardyŋ jalpy kölemı 32,5 mlrd teŋgenı qūraidy. Jaŋa öndırıs joǧary tehnologiialyq öndırıstık quattardy lokalizasiialauǧa jäne damytuǧa baǧyttalǧan.
Farmasevtikalyq zauyt därılık preparattyŋ 20 türın şyǧarudy josparlap otyr. Olardyŋ qatarynda onkologiialyq jäne sirek kezdesetın aurulardy emdeuge arnalǧan därıler, sondai-aq zamanaui immunobiologiialyq preparattar bar.
Käsıporyndy ıske qosu 2031 jylǧa, jobalyq quatqa şyǧu 2032 jylǧa, al negızgı baǧyttar boiynşa tolyq siklge köşu 2034 jylǧa josparlanǧan.
Därı-därmek öndıru men sertifikattaudan bölek, ǧylymi-zertteu jäne täjıribelık-konstruktorlyq jūmystar da qarastyrylǧan. Özınıŋ R&D baǧytyn damytu, onyŋ ışınde bioekvivalenttılık zertteulerın jürgızu, tırkeu qūjattaryn daiyndau jäne halyqaralyq GMP standarttaryn engızu josparlanǧan. Būdan bölek, keşen bazasynda qazaqstandyq mamandardy oqytu jäne bılıktılıgın arttyru jüiesı qūrylady.
Jobany jüzege asyru eldıŋ därılık qauıpsızdıgın nyǧaituǧa jäne Almaty oblysy aumaǧynda zamanaui farmasevtikalyq öndırıs infraqūrylymyn qalyptastyruǧa mümkındık beredı. Şamamen 60 jaŋa jūmys orny aşylady.
«Jalpy qazırgı taŋda elde farmasevtikalyq öndırıs salasynda 8 ırı investisiialyq joba jüzege asyrylyp jatyr. Farmasevtika salasy oŋ dinamika körsetıp otyr. Ötken jyldyŋ qorytyndysy boiynşa otandyq farmasevtikalyq önım öndırısınıŋ kölemı 191,1 mlrd teŋgege jetıp, 2024 jylmen salystyrǧanda 8,7%-ǧa ösken. Salaǧa tartylǧan jalpy investisiia kölemı 390 mlrd teŋgeden asty»,–dep jazdy Ükımettıŋ baspasöz qyzmetı.
