Mäjılıs deputaty Ekaterina Smoliakova elımızde ymdau tılın tolyqqandy qarym-qatynas tılı retınde zaŋnamalyq deŋgeide tanudy ūsyndy. Tiıstı deputattyq saualdy ol premer-ministrdıŋ atyna joldady, dep habarlaidy «Adyrna» tılşısı.
«Qazaqta: «Aitylmaǧan söz jetım»,- deidı. Bıraq keide mäsele adamnyŋ aitqysy kelmegenınde emes. Mäsele — qoǧamnyŋ ony tüsınbeuınde. Bügınde elımızde estu jäne söileu qabıletı būzylǧan 30 myŋnan astam adam bar. Onyŋ 5 myŋǧa juyǧy — balalar. Olar üşın ymdau tılı — jai qarym-qatynas qūraly emes. Būl — olardyŋ älemmen bailanysy. Būl — olardyŋ tılı. Bıraq paradoks mynada: Qazaqstanda ymdau tılı älı künge deiın zaŋnamalyq deŋgeide moiyndalmaǧan. Saldarynan myŋdaǧan azamat aqparatqa, bılımge, jūmys ısteuge, memlekettık qyzmetterge tolyq qol jetkıze almai otyr. Būl — teŋ mümkındık mäselesı»,-dedı ol.
Smoliakova qazırgı taŋda joǧary oqu oryndarynda estu qabıletı būzylǧan studentterdıŋ sany az ekenın atap öttı.
«Bügınde JOO-larda osy sanattaǧy studentterdıŋ sany nebärı 185 adam. Nege? Sebebı orta beiımdelmegen. Qoljetımdılık älsız. Qoldau jetkılıksız. Älemdık täjıribe mülde basqa. Jaŋa Zelandiia ymdau tılıne memlekettık märtebe berdı. Finliandiia ony Konstitusiiada bekıttı. Köptegen elderde ymdau tılı bılım beru men memlekettık qyzmettıŋ ajyramas bölıgıne ainalǧan. Al bızde estu jäne söileu qabıletı būzylǧan balalarǧa sabaq beretın surdopedagogtardyŋ sany nebärı 221 maman ǧana. Būl mamandardy elımızde tek 4 joǧary oqu orny daiyndaidy. Al osy mamandyqta oqyp jatqan studentter sany — bar bolǧany 35 adam. Būl — kadr tapşylyǧynyŋ naqty körınısı»,–dedı deputat.
Sondai-aq ol surdoaudarma qyzmetınıŋ limitı jylyna 60 saǧatpen şekteletının synǧa aldy. Deputattyŋ pıkırınşe, būl uaqyt azamattardyŋ kündelıktı qajettılıgıne de jetpeidı.
Mäjılıs deputaty Ükımetten ymdau tılın zaŋnamalyq deŋgeide tanudy, ony bılım beru, medisina, sot, memlekettık qyzmet jäne BAQ salalarynda qoldanuǧa kepıldık berudı sūrady. Būdan bölek, surdoaudarma qyzmetınıŋ limitın qaita qarau, subtitr men surdoaudarmasy bar kontent kölemın arttyru jäne surdopedagog mamandaryn daiarlau sanyn köbeitu ūsynyldy.
«Estu qabıletı būzylǧan azamattarǧa teŋ mümkındık beru — būl qaiyrymdylyq emes. Būl — ädılettı memlekettıŋ belgısı. Barlyǧy dauyspen söilemeuı mümkın. Bıraq är adamnyŋ estıluge qūqyǧy bar»,- dep tüiındedı ol.
