Biyl Ükımet jer qoinauyn neǧūrlym egjei-tegjeilı auqymda zertteudıŋ jaŋa kezeŋıne kırısedı, dep habarlaidy «Adyrna» tılşısı.
Atalǧan şaralar prezident Qasym-Jomart Toqaevtyŋ el aumaǧyn zamanaui geologiialyq barlau ädısterımen geologiialyq tūrǧydan zertteu deŋgeiın arttyru jönındegı tapsyrmalaryn oryndau aiasynda jüzege asyrylady.
Ötken jyly 100 myŋ şarşy şaqyrym jalpy alaŋda 1:50.000 masştabty geologiialyq tüsırılım jürgızuge 20 joba äzırlengen, odan keiın jyl saiyn 30 myŋ şarşy şaqyrym bolatyn eŋ perspektivaly uchaskeler qamtylǧan. Salystyru üşın aitatyn bolsaq, keŋes zamanynda jasalǧan kartanyŋ būrynǧy masştaby 1:200.000 bolǧan.
«Taiaudaǧy üş jylda joǧaryda atalǧan 20 jobany jüzege asyru üşın, sondai-aq az zerttelgen şögındı basseinder aumaǧynda seismikalyq barlau jūmystaryn jürgızuge, qazırgı zamanǧy geologiialyq infraqūrylymdy qūruǧa 240 mlrd teŋge nemese şamamen $500 mln baǧyttau josparlanyp otyr, jalpy soŋǧy 15 jylda $469 mln salyndy»,-dep tüsındırdı Ükımettıŋ baspasöz qyzmetı.
Jobalarǧa Jerdı qaşyqtyqtan zondtau derekterın taldau, aerogeofizikalyq jäne geohimiialyq zertteuler, dalalyq jūmystar keşenı kıredı.
Uchaskeler tızbesın qalyptastyru kezınde qorlardyŋ sarqylu faktorlary, jer qoinauyn paidalanuşylardyŋ bolmauy ne eŋ az sany jäne paidaly qazbalardyŋ basym türlerı boiynşa perspektivalylyǧy eskerılgen. Nätijesınde mys, altyn, qorǧasyn, myryş, sirek jer elementterı, barit, boksit ken oryndaryn anyqtau boiynşa äleuetı joǧary alaŋdar anyqtalǧan.
Būdan bölek, az zerttelgen mūnai-gaz perspektivaly – Soltüstık Torǧai, Şu-Sarysu jäne Syrdariia basseinderınde seismikalyq barlau jūmystaryn jürgızu josparlanuda. Sondai-aq zerthanalyq-taldamalyq bazany jaŋǧyrtu jäne geologiialyq derekterdı sifrlandyru közdelude.
«Osy masştabta jer qoinauyn geologiialyq zertteuge köşu Europalyq Odaq, Kanada, Avstraliia, Qytai elderınıŋ halyqaralyq täjıribesıne säikes keletın geologiialyq boljamdardyŋ däldıgın edäuır arttyruǧa mümkındık beredı. Aimaqtyq kartaǧa egjei-tegjeilı tüsıru perspektivaly aumaqtardy anyqtau, geologiialyq jäne investisiialyq täuekelderdı azaitu jäne keiınnen geologiialyq barlau men paidaly qazbalardy öndıruge jeke investisiialardy tartu üşın bazalyq negız bolady»,- delıngen habarlamada.
