Qytailyq Xi’an Aisheng Technology Group Co., Ltd kompaniiasy jasaǧan jaŋa jük tasymaldauşy dron «Tianma-1000» alǧaşqy synaq ūşuyn jasady, dep habarlaidy "Adyrna" ūlttyq portaly.
Būl dron tolyq qytailyq öndırıs bolyp tabylady. Ol logistikalyq tasymaldau, qūtqaru operasiialary men jükterdı jetkızu üşın arnalǧan universaldy platforma bolyp sanalady.
Qūrylysşylarynyŋ aituynşa, būl Qytaidaǧy alǧaşqy jük drony, ol tauly aimaqtar men kürdelı relefte ūşa alady, öte qysqa qaşyqtyqtan ūşyp-qonuǧa qabılettı, sondai-aq jük tasu rejimınen ony äue arqyly tastau rejimıne tez auystyruǧa bolady.
Dronnyŋ maksimaldy ūşu qaşyqtyǧy – 1800 km, jük köteru qabıletı – 1 tonnaǧa deiın. Ol jyldam jetkızu ekspress-marşruttaryn ūiymdastyruǧa qoldanyla alady. Dronda intellektualdy marşrutty josparlau jäne kedergılerden aulaq bolu jüiesı ornatylǧan, ol taular men ǧimarattar siiaqty kedergılerdı özdıgınen ainalyp ötıp, belgısız äue keŋıstıgınde qauıpsız jūmys ısteudı qamtamasyz etedı.
Jük bölıgınıŋ moduldık qūrylysy drondy ärtürlı tapsyrmalarǧa jyldam beiımdeuge mümkındık beredı.
Dronnyŋ joǧarǧy biıktıgı – 8000 metr, al ūşu-qonu joly 200 metrden az. Arnaiy jolaqtar qajet emes, ol aşyq alaŋ nemese topyraq jolynda da ūşa alady.
Jük tieu jäne tüsıru avtomattandyrylǧan jüiemen jüzege asady. Dronda bırneşe tonna jük 5 minuttan az uaqyt ışınde öŋdeledı, būl tapsyrmalardy tolyq avtomattandyruǧa mümkındık beredı.
