Halyqaralyq qylmystyq sottyŋ (HQS) sotqa deiıngı palatasy Täjıkstan bilıgınen Resei prezidentı Vladimir Putindı qamauǧa alyp, sotqa tapsyrudan bas tartuyna bailanysty resmi tüsınıkteme berudı talap ettı, dep habarlaidy "Adyrn" tılşısı Azattyq radiosyna sılteme jasap.
Atalǧan talap HQS tarapynan ötken jyldyŋ 5 qaraşasynda joldanǧanymen, būl aqparat endı ǧana belgılı boldy. Sottyŋ mälımetınşe, Vladimir Putin 2025 jyldyŋ qazan aiynda Täjıkstanǧa resmi saparmen barǧan, alaida Duşanbe ony qamauǧa alu jönındegı mındettemenı oryndamaǧan.
HQS eske salǧandai, Resei prezidentıne qatysty qamauǧa alu orderı 2023 jylǧy 17 nauryzda Ukrainadaǧy äskeri qylmystarǧa bailanysty berılgen. Sol jyldyŋ säuır aiynda sot hatşylyǧy Rim statutyna qatysuşy barlyq memleketke, sonyŋ ışınde Täjıkstanǧa da, Putindı qamauǧa alu qajettıgı turaly resmi sūrau joldaǧan. Qūjatta Täjıkstan būl sūraudy 2023 jyldyŋ mamyrynda alǧanyn rastaǧan. Degenmen, 2025 jylǧy 25 qyrküiekte ony oryndau mümkın emes ekenın habarlaǧany körsetılgen.
Täjıkstan bilıgı öz ūstanymyn Reseidıŋ Rim statutyna qatysuşy emes ekenımen jäne Mäskeumen jasalǧan ekıjaqty kelısımderde joǧary lauazymdy tūlǧalardyŋ immunitetı qarastyrylǧanymen tüsındırgen. Sonymen qatar Duşanbe būl şeşımın HQS-pen yntymaqtastyqtan bas tartu dep sanamaitynyn mälımdegen.
Al Halyqaralyq qylmystyq sot öz kezegınde lauazymdy tūlǧalardyŋ, sonyŋ ışınde üşınşı elderdıŋ memleket basşylarynyŋ jeke immunitetı sot ısın jürgızuge kedergı bola almaitynyn jäne ol üşın arnaiy immunitetten bas tartu talap etılmeitının atap öttı.
Qazırgı uaqytta HQS sotqa deiıngı palatasy Täjıkstannyŋ sotpen yntymaqtastyq jasamady dep tanu mäselesın jäne būl jaǧdaidy sotqa müşe memleketter assambleiasynyŋ qarauyna beru mümkındıgın qarastyryp jatyr.
