2026 jyly Maraldy auyldyq okrugın damytuǧa 600 million teŋge bölınedı. Būl turaly Şyǧys Qazaqstan oblysynyŋ äkımı Nūrymbet Saqtaǧanovtyŋ Maraldy auylynyŋ tūrǧyndarymen kezdesuınde belgılı boldy.
Aimaq basşysynyŋ aituynşa, 2025 jyly jergılıktı altyn öndıruşı kompaniiamen jasalǧan memorandum aiasynda okrugtıŋ äleumettık-ekonomikalyq damuyna 400 million teŋge bölındı. Atalǧan qarajat esebınen Qystau–Kürşım auylyndaǧy ortalyq köşe jöndelıp, Maraldy auylyndaǧy Ūly Otan soǧysy ardagerlerıne arnalǧan alleiaǧa granit taqtaişalar töseldı.
Sonymen qatar tūrǧyndardyŋ qolailylyǧy üşın Starlink sputniktık internetı ornatylyp, ortalyq saiabaqtyŋ qorşauy jaŋartyldy. Auyl stadiony jaŋa sporttyq qūral-jabdyqtarmen tolyqtyrylyp, jalpy paidalanymdaǧy joldar men ötkelder abattandyryldy. Būdan bölek, Üşbūlaq jäne Qystau–Kürşım auyldarynda şaǧyn futbol alaŋdary, jas mamandar üşın tūrǧyn üiler salyndy.
Keler jyly okrugtıŋ damuyna 600 million teŋge bölınedı. Barlyq jūmystar tūrǧyndardyŋ ūsynystary men ötınışterı eskerıle otyryp jürgızıledı.
Kezdesu barysynda oblys äkımı Maraldynyŋ tarihi maŋyzyna toqtalyp, auyldyŋ bolaşaǧyna senım bıldırdı.
«Tuǧan jer – altyn besıgım» deidı dana halqymyz. Maraldy – ata-babamyzdyŋ ızı qalǧan, maŋdai termen körkeigen, bızge amanat bolyp jetken qasiettı meken. Bügın bız Jaŋa Maraldy turaly aityp otyrmyz. Jaŋa Maraldy – būl jai söz emes, būl – naqty ıster, är tūrǧynǧa körınıp otyrǧan nätijeler. Jaŋa Maraldy – ümıt, senım jäne bolaşaqqa jasalǧan qadam», – dedı oblys äkımı Nūrymbet Saqtaǧanov.
