Ресейлік «КДВ Групп» холдингінің Қазақстандағы бөлімшесі – «КДВ Казахстан» ЖШС-і бағаға манипуляция жасады деген күдікке ілінді, деп хабарлайды "Адырна" ұлттық порталы.
Осы компанияға қатысты тергеуді Қазақстан Республикасының Бәсекелестікті қорғау және дамыту агенттігі (БҚДА) жүргізіп жатыр.
БҚДА мәліметінше, компания бірдей кондитерлік өнімдерді әртүрлі бағамен және әртүрлі шарттармен ұсынған. Осыған байланысты ресейлік холдингтің Қазақстандағы еншілес компаниясы баға дискриминациясына және Қазақстанның бәсекелестік заңнамасын бұзуға қатысы бар деген күдікке ілінді.
«Антимонополиялық орган бұған дейін “КДВ Қазақстан” ЖШС-іне анықталған заңбұзушылық белгілерін ерікті түрде жою туралы хабарлама жолдаған. Алайда компания бұл ескертуді елемеген. Соның нәтижесінде тергеу басталды», – деп мәлімдеді агенттік.
«КДВ Қазақстан» ЖШС – ірі ресейлік азық-түлік холдингі «КДВ Групп»-тың бөлімшесі. Бұл компанияға түрлі брендтермен 700-ден астам өнім түрін шығаратын 15 фабрика тиесілі. Өнімдері Қазақстаннан бөлек, ТМД елдеріне де экспортталады.
«КДВ Групп»-ты Ресейде кәсіпкер Денис Штенгелов негізін қалаған. Forbes дерегінше, 2023 жылғы мәлімет бойынша оның байлығы шамамен 1,3 миллиард долларды құрайды.
