АҚШ президенті Дональд Трамп Украина басшысы Владимир Зеленскийді соғысты тез арада тоқтатуға шақырып, оны сайлау өткізуден бас тартқаны үшін айыптады, деп хабарлайды "Адырна" ұлттық порталы.
Трамптың айтуынша, Зеленский тек "мықты комик" ретінде танылған және оның Украинадағы рейтингі 4% ғана. Ол Зеленскийдің АҚШ-ты жеңу мүмкін емес соғысқа 350 миллиард доллар жұмсауға көндіргенін сынап, бұл сома Еуропаның қаржылай қолдауынан 200 миллиард долларға артық екенін айтты. Сонымен қатар, АҚШ бұл қаражатқа ешқандай кепілдік алмағанын алға тартты.
Трамп Украина басшысын бөлінген қаражаттың бір бөлігін жоғалтып жіберді деп айыптап, сайлау өткізбей, билікте қалу үшін түрлі айла қолданғанын жеткізді. Оның пікірінше, Украина басшысы Ресеймен бейбіт келіссөздер жүргізуге қарсы әрекет етуде.
"Сайланбаған диктатор Зеленский тез әрекет етуі керек, әйтпесе оның елінен түк қалмайды. Бұл арада біз Ресеймен соғысты тоқтату туралы сәтті келіссөздер жүргізіп жатырмыз. Себебі бәрі мұны тек Трамп пен Трамп әкімшілігі жасай алатынын мойындайды", – деді ол.
ТАСС мәліметінше, Зеленский Трамптың айыптауларын жоққа шығарды. Украинада жүргізілген әлеуметтік сауалнамаға сәйкес, ел тұрғындарының 57%-ы оған сенім білдіреді. Зеленский Трамптың Украинаны Сауд Арабиясындағы келіссөздерге қатыстырмағанын сынға алды және оның Ресей тарапынан тараған жалған ақпаратқа сенгенін айтты.
Трамптың бұл мәлімдемелері Еуропада, әсіресе Германияда алаңдаушылық тудырды. Германия канцлері Олаф Шольц АҚШ-тың келіссөздердегі ұстанымын өзгерткенін мәлімдеп, Украина бұл процестің негізгі қатысушысы болуы керек екенін айтты.
АҚШ-тың вице-президенті Джей Ди Вэнс Зеленскийге Трамппен қоғамдық қақтығыстардан сақтануға кеңес берді, себебі бұл жағдайды одан әрі шиеленістіріп жіберуі мүмкін. Сонымен қатар, Киевке Трамптың арнайы өкілі Кит Келлог келді, бұл мәселенің АҚШ үшін маңыздылығын көрсетеді.
Айта кетейік, бұған дейін Ресей президенті Владимир Путин Трамппен кездесуге дайын екенін мәлімдеген еді.
