Алматыда Мұхтар Әуезов атындағы Қазақ ұлттық драма театрында мемлекет және қоғам қайраткері Мұрат Мұхтарұлы Әуезовпен қоштасу рәсімі өтті, деп хабарлайды "Адырна" ұлттық порталы ҚазАқпаратқа сілтеп.
Қазақстандық қоғам қайраткері, мәдениеттанушы Мұрат Әуезовтің қоштасу рәсіміне министрлік пен әкімдік өкілдері, сенат депутаттары, қоғам қайраткерлері мен қазақ зиялылары, марқұмның туған-туыстары қатысты. Іс-шара барысында Мемлекет басшысының көңіл айту хатын Президент кеңесшісі Мәлік Отарбаев оқыды.
"Аса көрнекті мемлекет және қоғам қайраткері, мәдениеттанушы, шығыстанушы ғалым, бірінші дәрежелі Барыс орденінің иегері, дипломат Мұрат Мұхтарұлы Әуезовтің дүниеден өтуіне байланысты қайғыларыңызға ортақтасып, көңіл айтамын. Мұрат Мұхтарұлы ұлт руханиятының алға басуына, қазақ ғылымының көкжиегін кеңейтуге бар саналы ғұмырын арнаған зиялы, парасатты тұлға еді. Қазақ әдебиеті мен мәдениетін, тарихын терең зерделеп, сонда өлшеусіз мұра қалдырды. Қазақстанның халықаралық дәрежедегі беделінің артуына өзінің саяси қоғамдық істерімен зор үлес қосты", - делінген Мемлекет басшысының көңіл айту хатында.
Қоштасу рәсімінде мемлекет және қоғам қайраткері Мұхтар Құл-Мұхамед Мүрат Әуезов пен әкесі Мұхтар Әуезовтің арасындағы ерекше байланысқа тоқталды.
"Асылдың сынығы десек те, тұлпардың тұяғы десек те жарасатын асыл адаммен қоштасуға келіп отырмыз. Мұхтар Әуезовтің 4 ұлы болған. Біріншісі, Шоқан деген баласы 1 жасында шетінеп кеткен. Одан кейін Ленинградта оқып жүрген кезде Валентина жеңгемізден туған Елдес деген бала да 1 жасында қайтыс болған. Одан кейін Елдар деген баласы 3 жасында шетінеп кетеді. Ұлдан тұқымсыз қалам ба деп жүргенде Фатима жеңгемізбен көңіл қосып, дүниеге Мұрат келеді. Мұратты анасының құрсағына біткен күннен бастап аялаған адам - Мұхтар Әуезов. «Алтын балам» деп хат танымаған баласына талай хат жазған. Міне сол алтын бала әкесінің сенімін ақтады", - деді Мұхтар Құл-Мұхамед.
Айта кетейік, 14 маусым күні мәдениеттанушы, ғалым, дипломат, мемлекет және қоғам қайраткері, Мұхтар Әуезовтің ұлы Мұрат Әуезов өмірден өткенін хабарлаған болатынбыз.
