Өскемен қаласында ата-аналардан ақша жинаған мектеп мұғалімі жауапқа тартылды, деп хабарлайды “Адырна” ұлттық порталы.
Сыбайлас жемқорлыққа қарсы іс-қимыл агенттігі ШҚО бойынша департаментінің мәліметіне сүйенсек, 1424 Call-орталығына Өскемендегі №15 орта мектеп оқушысының анасы хабарласқан.
Өз сөзінде ол мұғалімнің мектеп кабинетін жөндеуге ақша жинап жатқанын айтып, шағым түсірді.
Тексеру барысында аталған факті расталды. Жиналған қаражат ата-аналарға толықтай қайтарылды.
ҚР «Білім туралы» заңының 63-бабын бұзған педагог «сөгіс» түріндегі тәртіптік жауапкершілікке тартылды.
Сондай-ақ департамент қызметкерлері мектеп әкімшілігіне түсіндіру жұмыстарын жүргізген.
