Aleksandr Vınokýrovtyń eki uly «Astana Qazaqstan Development Team» veloquramyna qosyldy

2425
Adyrna.kz Telegram

UCI «Astana Qazaqstan Team» velokomandasynyń jastar jobasy bolyp tabylatyn «Astana Qazaqstan Development Team» qurlyqtyq komandasy 2022 jylǵy debıýttik velomaýsymǵa óz quramyn jarııalady, dep habarlaıdy «Adyrna» ulttyq portaly.

Esterińizge sala keteıik, qarashanyń birinshi onkúndiginde «Astana Qazaqstan Team» basshylyǵy 23 jasqa deıingi shabandozdardy irikteý úshin UCI qurlyqtyq komandasyn qurý týraly sheshim qabyldaǵan bolatyn.

Jastar veloujymynyń 2022 jylǵy jańa maýsymdaǵy basty maqsattarynyń biri Eýropadaǵy eń bedeldi jastar jarystarynda óner kórsetip, birqatar kásibı deńgeıdegi velododalarǵa qatysý bolmaq. Biraq qurlyqtyq velokomanda UCI «Europe Tour» serııasynyń jarystaryna ǵana qatysa alady.

Qazaqstandyq velokomanda resmı saıtynyń habarlaýynsha, kelesi maýsymda «Astana Qazaqstan Development Team» qurlyqtyq komandasynyń negizgi quramyna on shabandoz kiredi. Olardyń beseýi Qazaqstannyń, taǵy beseýi – Italııa, Ekvador, Kolýmbııa, Franııa jáne Latvııanyń namysyn qorǵaıtyn bolady. Sondaı-aq jastar komandasynyń qazaqstandyq qatysýshylary arasynda «Astana Qazaqstan Team» bas menedjeri, tanymal qazaqstandyq veloshabandoz Aleksandr Vınokýrovtyń eki uly – 19 jasar Aleksandr Vınokýrov pen Nıkolıa Vınokýrov ta bar.

«Astana Qazaqstan Development Team» quramyna jasóspirimder arasyndaǵy toptyq jarysta Azııa chempıonatynyń (2019) jáne 23 jasqa deıingi toptyq jarysta Qazaqstan chempıonatynyń (2021) qola júldegeri Órken Slamjanov, jasóspirimder arasyndaǵy jeke jarysta Qazaqstan chempıony (2021), jasóspirimder arasyndaǵy toptyq jarysta Qazaqstan chempıonatynyń kúmis júldegeri (2021), kópkúndik «Kaıserı Djýnıor Reıs» jáne «Velo Ersıes Djýnıor Reıs» jarystarynyń jeńimpazy (2021) Andreı Remhe, qazaqstandyq jastardyń sheteldik qatysýshylarynan 23 jasqa deıingi jeke jarysta Ekvador chempıony (2021), 23 jasqa deıingi toptyq jarysta Ekvador chempıonatynyń kúmis júldegeri (2021), «Výelta Kosta-Rıka» kezeńiniń jeńimpazy (2019), «Výelta Gvatemala» (2020) eki kezeńiniń jeńimpazy jáne «Výelta Ekvador» (2020) qola júldegeri Harold Martın Lopes te kirgenin atap ótý qajet.

Sonymen birge qazaqstandyq komandada «Djıro Valle d 'Aosta» kópkúndik jarystarynyń kúmis júldegeri (2021), jasóspirimder arasyndaǵy toptyq jarystyń Italııa chempıony (2019) jáne «Trofeo Býffonı» birkúndik jarysynyń jeńimpazy (2019) ıtalıandyq Djanmarko Garofolı, «Sent-Romen Gran-prı» birkúndik jarysynyń qola júldegeri (2021), «Výelta a la Sýbbetıka» kópkúndik jarysynyń qola júldegeri (2020) óner kórsetedi.

Sondaı-aq «Týr Dý Jevodan Oksıtanııa» bir kúndik jarysynyń (2020) jeńimpazy Franýz Pablo Sanches pen jasóspirimder arasyndaǵy toptyq jáne jeke jarysta Latvııa chempıony (2021) Matıs Kalvershs, velokross baǵytyna mashyqtanǵan ıtalıandyq shabandoz Davıde Tonettı de qosylmaq.

«Meniń oıymsha, biz jas veloshabandozdardyń ońtaıly ári teńdestirilgen quramyn jınaı aldyq. Olardyń kópshiliginde eń joǵary deńgeıdegi jasóspirimder men jastar jarystarynda óner kórsetýdiń mańyzdy tájirıbesi bar. Jańa komandanyń debıýttik maýsymy sátti bolady dep úmittenemin», - dep sózin túıindedi «Astana Qazaqstan Team» velokomandasynyń bas menedjeri Aleksandr Vınokýrov.

«Astana» kásibı sport klýbynyń bas seriktesi – «Samuryq-Qazyna» UÁQ» AQ, quryltaıshysy – Týrızm ındýstrııasy men sportty qoldaý qory

Oralbaı MERGENBAIULY

Pikirler