«Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly Memleket basshysy Nursultan Nazarbaevtyń jarııalaǵan bes áleýmettik bastamasy týraly pikirin bildirdi, dep habarlaıdy «QazAqparat» HAA tilshisi.
«Birinshiden aıtarym, Elbasy sóziniń sońynda eldegi turaqtylyqty tilge tıek ete kele, qazaq ultynyń jaýapkershiligi týraly aıtty. Iaǵnı, Memleket basshysy qazaq ultynyń mártebesin erekshe atap ótti. Bul - basqa ulttardyń dárejesin túsirý degendi bildirmeıdi. Iaǵnı, Qazaqstannyń turaqtylyǵy eń aldymen qazaq ultyna baılanysty. Qazaqstandaǵy orys, uıǵyr, nemis nemese káris bolsyn, báriniń yntymaǵyna eń birinshi qazaqtar jaýapty. Óıtkeni, qazaq ulty osy eldiń de, jerdiń de ıesi. Qazaqstanda bári de tatý-tátti ómir súrip, eshkim eshkimmen kıkiljińge kelmeýi kerek. Eshkim de teńsizdikti sezinbeýi tıis. Qazaqstandaǵy ulttardyń bári de bir-birine dos-baýyr. Sondyqtan, Prezıdent óz sózinde qazaqtardyń ulttyq jaýapkershiligin aıqyndap berdi dep esepteımin», - dedi Berik Ábdiǵalıuly.
«Qasıetti Qazaqstan» ǵylymı-zertteý ortalyǵynyń basshysy sonymen qatar, áleýmettik bastamalardyń mańyzdylyǵyna toqtaldy.
«Áleýmettik bastamalardyń qaı-qaısysy da eń ózekti máselelerdi qamtyp otyr. Eń birinshiden, turǵyn úı máselesiniń mańyzy zor. Bizdiń bárimiz shetelde úı alý kezinde paıyz az dep jatamyz. Endigi kezekte Qazaqstan da úı alý kezindegi paıyzdyq mólsherlemeni 7 paıyzǵa túsirip jatyr. Alǵashqy jarna 20 paıyz bolyp, 25 jylǵa bóline tólenetin úıdiń baǵasymen kúni erteń kóp adamnyń baspanaly bolýǵa múmkindigi arta túsedi. Sondyqtan, meniń oıymsha, bul bastamany halyq erekshe qýana qabyldaǵan sekildi. Salyqty tómendetip, memlekettiń «ár adamnyń tabysy ózinde qalsyn» degen ustanymyn da aıryqsha atap ótkim keledi», - deıdi ol.
Berik Ábdiǵalıuly oqý bitirgen túlekterdiń birshamasy keıde oqýǵa túse almaı qınalyp jatatynyn, osyǵan baılanysty bólinetin qosymsha 20 myń grant máseleni sheshetinin eske saldy. «20 myń adam qosymsha bilim alýǵa múmkindik alady. Úkimet taǵy da qarjylandyraıyn dep jatyr. Ásirese tehnıkalyq mamandyqtarǵa basa den qoıylýda. Sonyń bárine 20 myń grant bólý degen - daryndy jastardyń jolyn ashady dep bilemin. Grant bólip qana qoımaı, jataqhana máselesi de nazardan tys qalǵan joq. Ásirese, óńirlerde turatyn jastarǵa bul keremet múmkindik. Jataqhana turǵyzylsa, búkil jetispeýshilik máselesi sheshiledi. Kásippen aınalysam degenderge qosymsha 20 mlrd teńge bólingeli otyr. Kásibin bastaımyn degenderge bul óte úlken qoldaý», - deıdi Berik Ábdiǵalıuly.
Berik Ábdiǵalıulynyń paıymdaýynsha, qalalarǵa gaz tartý jumysy baǵytynda jasalǵan qadamdar ekologııalyq máselelerdi sheshýge yqpal etedi. Qaraǵandy, Temirtaý, Jezqazǵan, Astanaǵa jetetin gaz baǵa turǵysynan da halyqqa yńǵaıly bolyp keledi.
«Elbasy áleýmettik qundylyqqa, birlik pen ádilettilikke mán berip otyr. Iaǵnı, Memleket basshysy «Rýhanı jańǵyrýmen» birge, áleýmettik jańǵyrýdyń kezegi kelgenin bildirdi. Bunyń bári tutas ultymyzdyń, elimizdiń damýyna serpin bereri sózsiz», - dep túıdi Berik Ábdiǵalıuly.
Eske sala ketsek, Qazaqstan Prezıdenti Nursultan Nazarbaev Parlament palatalarynyń otyrysynda bes áleýmettik bastamany jarııa etken bolatyn.
El Prezıdenti óz sózinde «El birligi - eń birinshi qazaqtyń ózine kerek» ekenin atap ótken edi.
«Búgingi bastamalar elimiz tutas, qoǵamymyz turaqty bolǵanda ǵana tabysty júzege asady. Ótken 26 jyl táýelsizdik ishinde biz osy qaǵıdany ustanǵandyqtan ǵana belesterdi eńserdik. Al el birligi - eń birinshi qazaqtyń birligi ekenin aıtyp kelemin. Jahandyq kóshtiń basynda júretin mereıli el bolý úshin birlik pen yntymaq aldymen elimizge, qazaqqa kerek», - dedi Memleket basshysy.
http://www.inform.kz
