Bılikpen aıtysamyz, tartysamyz. Jalpy ıdeologııalyq turǵyda bolsyn, jekelegen máseleler boıynsha bolsyn, pikir talastyryp kelemiz.
Sonda uqqanym mynaý: bılik basynda otyrǵandar ekige bólinedi.
Biri – júıe ábden taptap, bárin bir qatarǵa turǵyzyp qoıyp, ashsa alaqanynda, jumsa, judyryǵynda ustap, tyrp etkizbeıtin soldattar.
Ekinshisi – júıe ishinde júrip, onyń aıtpasa da túsinikti erejeleri men sharttaryn qabyldasa da, óz bilimi men biliktiline nyq senimdi, sol sebepti oryndy jerinde minez kórsete alatyn tulǵalar.
Alǵashqy toptaǵylar – tutas bir armııa bolsa, ekinshileri – sırek kezdesetin qolbasshylyq qasıetteri bar qaıratkerler, beıresmı lıderler. Olar rejımniń Prokrýst qalybyna sııa almaǵandar, sııa almaıtyndar. «Oıymyzdaǵyn aıtyp, minez tanytamyz» dep birazy ártúrli sebeptermen qatardan shyǵarylyp, «óship» te qalǵan.
Sol sanattaǵylardyń biregeıi – búgin 65-ke tolyp otyrǵan Imanǵalı Tasmaǵambetov. Onyń talantty uıymtastyrýshy, memleketshil, ultshyl qaıratker ekenin fanattary da, ata jaýlary da moıyndaıdy.
Bir nárse anyq: ol Nursultan Nazarbaevtyń ózine jáne ol qurǵan bılik júıesine berilgen, oǵan shyn nıetimen qyzmet etken tulǵa. Oǵan Nazarbaev ta úlken senim artty. Sondyqtan ol prezıdent laýazymynan basqa qyzmettiń bárin atqardy. Ondaı karera jasaǵan sheneýnik qazaqta joq shyǵar.
«Jaqsy jigittiń sońynan sóz eredi» degen ataly sóz bar. «Sheneýniktiń bári jemqor» degen jalpaq sóz bar. Qasqyrdyń aýzy, jese de, qan, jemese de, qan. Imekeń de «tıse terekke, tımese, butaqqa» prınıpimen aıtylatyn sol jalpylama hám birjaqty pikirdiń bir qurbany dep bilemin.
Bul júıe eshkimdi aıamaıdy. Bálkim, onyń quıryǵyna da qońyraý baılap qoıǵan shyǵar. Ol jaǵyn bilmedim.
Biraq aıtaıyn degenim myna eki shyndyq.
Tasmaǵambetovtyń eki tragedııasy bar.
Biri – ol harızmasy erekshe, tym kórnekti, jarqyn tulǵa. Onyń bolmysyn, keıde tym qatty ketetin adýyn minezin bul júıe kótere almady dep sanaımyn. Jalpy, tym kózge túsken tulǵalardyń ortaq taǵdyry osy! Bul júıege ondaı adamdar kerek emes! Jáne de ony kóre almaı, týa bitken qasıetterine, el ishindegi bedeline, elektorattyq áleýetine qyzǵanyshpen qaraǵan basqa emes, naq óziniń qatarlastary, birge qyzmettes, dastarhandas bop, «Imeke, Imeke!», - dep quraq ushyp júrgender dep bilemin. Jáne de ol týraly ártúrli qaýesetterdi taratyp júrgender de solar men olarǵa baǵynyshty BAQ pen jeke tulǵalar dep bilemin. Áıtpese, qaıratker Tasmaǵambetovke degen eldiń kópshiliginiń kóńli qandaı ekenin bıliktiń ózi biledi dep sanaımyn. «Shańyraq» oqıǵasy tusynda da kúshteý qurylymdarǵa kim buıryq bergenin ýaqyt kórsete jatar. Óz basym, ondaı organdarǵa qala ákimi pármen bere alady degenge senbeımin.
Ekinshisi – ol bar sanaly ómirin sarp etken osy júıege jan-tánimen berilip, odan dál sondaı jaýap kútti. Olaı bolmady: bul júıe kez kelgen adamdy taptap óte beretin, bir adamnyń (onyń kim ekenin bárimiz bilemiz) múddesine tutas bir ultty, urpaqtardy, ıdeıalardy, Tasmaǵambetov sekildi jeke tulǵalardy qurban etýge ázir júıe.
PS. «Ásheıinde bıliktegi tanystary týraly post jazbaıtyn Ámirjan nege búgin sonsha lırıkaǵa salyndy?» deýshilerge jaýabym mynadaı.
Shynymen de, «oppozıııadaǵy meniń bireýge salqynym tıip ketpesin» dep bılikte júrgen dos, joldas, tanystaryma, burynǵy áriptesterime qatysty jarııa pikir bildirmeı júrgenim ras.
Biraq, «prezıdent bolýǵa laıyqty eki adam bolsa, biri Tasmaǵambetov» dep júrgen jurt ta onyń qazirgi kezeńde resmı qyzmette joq ekenin biledi. Sondyqtan, dál qazir salqynym tıe qoımas.
Sol salqyn tıip jatsa da, birneshe jyl boıyna Imekeńmen birge jumys istep, 28 jasymda mınıstr Tasmaǵambetovtyń orynbasary bolǵan meniń búgin, onyń týǵan kúninde únsiz qalǵanym yńǵaısyz bolar.
PS 2. "Antıtasmaǵambetovshil" kommentatorlarǵa aldyn-ala aıtaıyn: men onyń advokaty emespin, úkimetten ketkeli onymen turaqty baılanysym joq. Sol baıaǵy "salqynym tıip ketpesin" dep, "nege oppozıııamen aralasyp júr" dep ony aıyptamasyn dep, kezdesýge qushtar bolǵan emespin. Qoǵamda bar ártúrli aıyptarǵa azamat retinde ózi jaýap berer.
PS 3. Mynaý 1996 jylǵy foto. Tasmaǵambetov – vıe-premer, men – úkimet baspasóz qyzmetiniń jetekshisimin. Odan keıin fotoǵa túspeppiz. Ol áleýmettik saladaǵy reformalardy nasıhattap, 16 oblysty aralap kelgen tusy. Sol týraly jýrnalısterge esep berip jatyr. Qazir sondaı, kúni-túni aımaqtardy aralap, memleket saıasatyn túsindiretin sheneýnikter bar ma ózi?!
