Elimiz táýelsizdik alǵaly 30 jyl ishinde Mańǵystaý oblysynda 11 mln 333,2 myń sharshy metr turǵyn úı paıdalanýǵa berildi. Ásirese turǵyn úı qurylysy oblys ortalyǵynda qarqyndy júrýde. Aqtaýda sońǵy bes jylda jańa 11 shaǵyn aýdan boı kóterdi dep habarlaıdy oblys ákiminiń baspasóz qyzmeti.
Aıta keteıik, 2021 jyldyń jospary 1,201 sharshy metrdi qurady. Al bıylǵy 10 aıdyń qorytyndysy boıynsha 954 myń sharshy metr turǵyn úı tapsyrylǵan.
2020 jyly «Nurly jer» turǵyn úı-kommýnaldyq damytýdyń 2020-2025 jyldarǵa arnalǵan memlekettik baǵdarlamasy aıasynda jalǵa beriletin turǵyn úı qurylysyna jáne satyp alýǵa 2,4 mlrd. teńge bólindi. Bul qarajat kólemi 23,5 myń sh. m. 305 páterli turǵyn úılerdiń qurylysyna jáne 67 páter satyp alýǵa jumsaldy.
Aqtaý qalasynyń turǵyny Qylyshbaı Samat ta jańa páter aldy. Onyń aıtýynsha, ol «Aqqý-3» turǵyn úı keshenindegi alǵashqy páterin memlekettik baǵdarlamalarǵa sáıkes, «Otbasy bank» arqyly konkýrstan ótip alǵan. Baspanaly bolǵan jas jigit jaqynda shańyraq kótermek.
Budan bólek «Nurly jer» baǵdarlamasy boıynsha Aqtaý qalasynyń jańa shaǵyn aýdandarynda jańadan salynǵan turǵyn úılerdi ınjenerlik jelilermen qamtamasyz etýge respýblıkalyq bıýdjetten 3,2 mlrd. teńge bólindi. Qarajat tolyq ıgerilgen.
Bıyl «Nurly jer» memlekettik baǵdarlamasy aıasynda 1407 páterlik turǵyn úılerdiń qurylysyn aıaqtaý josparlanǵan.
- Qalanyń jańa shaǵyn aýdandarynda jeke qurylys salýshylardyń qatysýymen 100-den astam kóppáterli turǵyn úıdiń qurylysy júrgizilýde. Olardyń belgili bir bóligi osy jyldyń sońyna deıin paıdalanýǵa beriledi. Injenerlik jelilerdiń qurylysyna Ulttyq Qordan 4,5 mlrd.teńge bólindi. Ortalyq memlekettik organdar 13 jobany iske asyrýǵa kelisim berdi. Barlyq joba jyl sońyna deıin aıaqtalady dep kútilýde, - dedi Mańǵystaý oblysy qurylys, sáýlet jáne qala qurylysy basqarmasy basshysynyń mindetin atqarýshy Aınur Mankeshova.
«Adyrna» ulttyq portaly.
