Búgin oblys ákimi Nurlan Noǵaevtyń tóraǵalyǵymen Mańǵystaý oblysynda bıznesti qoldaý men damytýdyń memlekettik jáne óńirlik baǵdarlamasyn iske asyrý aıasynda jobalardy qaraý jónindegi óńirlik úılestirý keńesiniń otyrysy ótti dep habarlaıdy "Adyrna" ulttyq portaly Mańǵystaý oblysy ákiminiń baspasóz qyzmetine silteme jasap.
Komıssııa otyrysynda "Nur kapıtal" baǵdarlamasy aıasynda 1% nesıemen qarjylandyrylatyn 4 joba qaraldy.
Birinshi jobada kásipker Túpqaraǵan aýdany, Aqshuqyr aýylynan jylyjaı salyp, 500 tonna qııar, 500 tonna qyzanaq ósirýdi josparlap otyr. Joba oblys turǵyndarynyń qyzanaqqa 10,4% jáne qııarǵa 8,2% qajettiligin óteýge áser etedi.
Ekinshi jobada Qaraqııa aýdanynyń kásipkeri jol boıynda jolaýshylarǵa jaıly qyzmet kórsetý maqsatynda hostel salýdy kózdeıdi. Joba boıynsha hosteldiń jalpy aýmaǵy 400 sharshy metr.
Úshinshi jobada Munaıly aýdanynyń turǵyny jeke sharýa qojalyǵynda iri qara mal bordaqylaý arqyly et ónimderin óndirý úshin jeńildetilgen nesıe surady. Kásipker 40 bas sıyr men 40 bas jylqy satyp alyp, semirtip naryqtaǵydan tómen baǵamen et satýdy josparlap otyr.
Tórtinshi jobada jeke kásipker komıssııa múshelerine Jańaózen qalasynan «Repetıtorlyq ortalyq ashý» jobasyn usyndy. Ortalyq alǵash ashylǵan kezde 3 adam turaqty jumyspen qamtylady.
Komıssııa músheleriniń sheshimimen 4 joba da maquldandy.
Aıta ketsek, "Nur Kapıtal" óńirlik baǵdarlamasy aıasynda jeńildetilgen nesıe alý úshin kásipker ekinshi deńgeıli bankten 8,5% - ben nesıe alady, onyń 7,5% - yn memleket "Kaspıı "ÁKK" AQ arqyly sýbsıdııalaıdy. Nátıjesinde kásipker nesıe boıynsha paıyzdyq mólsherlemeni 1%-ben tóleıdi. Nesıe mólsherń — 30 mln teńge. Sýbsıdııalaý merzimi — 5 jylǵa deıin.
"Adyrna" ulttyq portaly
