Aqtóbe oblysy ákimi Berdibek Saparbaev barlyq aýdan ákiminie oramal máselesin úsh aıda joıýǵa tapsyrma berdi, dep habarlaıdy Aktobenews.kz.
Oblys ákiminiń orynbasary Erbol Nurǵalıevtiń aıtýynsha, mektep formasyn saqtamaı júrgen oqýshylardyń sany 396-dan 197-ge deıin kemigen.
«Bul másele boıynsha Muǵaljar, Temir aýdandary jáne Aqtóbe qalasy jaqsy jumys istedi. Degenmen, bul másele kúrdeli bolyp tur. Atalǵan aýdandarmen qosa Alǵa, Shalqar, Qarǵaly, Hromtaý jáne Qobda aýdandarynyń ákimderi bul máselege erekshe nazar aýdarýlary qajet», — dedi Erbol Nurǵalıev.
Buny estigen oblys ákimi Berdibek Saparbaev óziniń orynbasaryna bul máseleni úsh aıdyń ishinde sheshýge tapsyrma berdi.
«Keshe ǵana Aqordada úlken jıyn ótti. Sonda mektep formasy jaıly Bilim jáne ǵylym mınıstrliginiń erejesi bar ekeni aıtyldy. Bul másele boıynsha barlyǵymyz birigip jumys isteýimiz kerek. Bul jerde ata-analar kináli. Jumys istelip jatyr, biraq nátıjesi nashar. Ákimderge tapsyrma beremin: úsh aıdyń ishinde 197 bala mektep formasyna kóshýleri tıis. Buǵan oblys ákiminiń orynbasary Nurǵalıev jaýapty», — dedi Berdibek Saparbaev.
