Elordada Qazaq radıosynyń 100 jyldyǵyna oraı saltanatty shara ótti

2930
Adyrna.kz Telegram

2021 jyly qazan aıynyń 1 kúni Nur-Sultan qalasyndaǵy «Qazmedıa ortalyǵynyń» Kınokonert zalynda Qazaq radıosynyń 100 jyldyǵyna arnalǵan saltanatty jıyn boldy, de habarlaıdy QazAqparat.

Shara tıisti karantın talaptaryna saı jáne teletúsirilim formatynda ótti. Jıynda Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń jáne Memleket basshysy Q.K.Toqaevtyń quttyqtaý hattary oqyldy.

Aıta ketý kerek, bıyl Memleket basshysynyń bastamasymen Qazaq radıosy qurylǵan 1 qazan «Radıo kúni» datasy retinde belgilenip, búgin alǵash ret atap ótilýde. Qazaq radıosy ujymyn quttyqtaý hatynda Elbasy halqymyzdyń talaıly tarıhy men shejiresi efırde qamtylyp, aýmaly-tókpeli kezeńderde el ómirindegi mańyzdy oqıǵalar jurtshylyqqa jedel jetkizilgenin erekshe atap ótti.

«Bir ǵasyr ishinde osy qarashańyraqta eńbek etken maıtalman jýrnalıster men kórnekti qaıratkerler kópshiliktiń ystyq yqylasyna bólenip, óshpes iz qaldyrdy. Áýe tolqynynda kóptegen baǵdarlamalar tól mádenıetimizdi nasıhattaýǵa, ana tilimizdi dáripteýge, ult sanasyn jańǵyrtýǵa ólsheýsiz úles qosyp, qazaq rýhanııatynyń altyn qoryn qalyptastyrdy.

Qazirgi tańda Qazaq radıosy elimizdegi zaman talabyna saı damyǵan irgeli aqparat quralynyń biri de biregeıi. Radıo aldaǵy ýaqytta da jaqsylyqtyń jarshysy bolyp, talǵamy bıik tyńdarman qaýymdy tanymdyq habarlarmen, taǵylymdy baǵdarlamalarmen qýanta beredi dep senemin», - delingen Elbasy quttyqtaýynda. Qazaqstan Respýblıkasynyń Prezıdenti Q.K.Toqaevtyń quttyqtaýynda

«Qazaq radıosynyń jylnamasy - halqymyzdyń 100 jylda júrip ótken jolynyń aınasy. Radıo alǵash qurylǵan kúnnen bastap el múddesine qyzmet etip keledi. Qazir de Táýelsizdiktiń qadir-qasıeti men ulttyq qundylyqtardy jastardyń sanasyna sińirýge súbeli úles qosýda. Táýelsizdigimizdiń 30 jyldyǵyna tuspa-tus kelgen búgingi mereıtoıdyń oryn bólek. Bıyldan bastap 1-shi qazan «Radıo kúni» bolyp bekitildi. Munyń ózi bul salanyń aqparat aıdynyndaǵy róli erekshe ekenin ańǵartady. Qazaq radıosy keleshekte de maǵynaly ári mazmundy habarlarymen ulttyń jadyn jańǵyrtyp, memleketimizdi nyǵaıtýǵa at salysa beredi dep senemin», - delingen.

Saltanatty jıynda QR Aqparat jáne qoǵamdyq damý mınıstri A. Ǵ. Balaeva Qazaq radıosyn mereıtoıymen quttyqtaı kele, onyń taralym aýmaǵyn keńeıtý maqsatynda shekara mańyndaǵy aýmaqtarda radıohabar taratýdyń memlekettik jelisin damytý jónindegi 2022-2025 jyldarǵa arnalǵan jol kartasy qabyldanyp, konkýrs negizinde Qazaq radıosyna 107 radıojıilik spektri bólingenin aıtty. Onyń naqty mysaly retinde jıyn barysynda ShQO, Tarbaǵataı aýdany, Kókjyra eldi mekeninde jańa radıojıilik iske qosyldy. Shara barysynda Nur-Sultan jáne Almaty qalalaryndaǵy Qazaq radıosynyń stýdııalarynan sahnaǵa tikeleı qosylym jasaldy. Merekelik keshte beınematerıaldar men mýzykalyq nómirler qoıyldy.

Qazaq radıosynyń «Altyn qorynda» saqtalǵan B. Momyshuly, Q. Qaısenov, M. Áýezov, A. Jubanovtyń úntaspaǵa jazylǵan suhbattarynan úzindiler berildi. Saltanatty kesh resmı bólim, «Bastaý kezeńi», «Damý dáýiri», «Jańa beles» degen bólimderinen turdy. Ár bólimde Qazaq radıosynyń tarıhı hronologııasy tanystyryldy. Merekelik sharaǵa ortalyq memlekettik organ basshylary, radıo ardagerleri men Qazaq radıosynyń ujymy jáne QR Parlamenti Senaty men Májilisiniń depýtattary, BAQ basshylary, qoǵam qaıratkerleri qatysty.

Pikirler