Atyraýda tórt aılyq balasyn pyshaqtap óltirgen bezbúırek ana sot aldynda jaýap bere bastady. Sot saraptamalyq zertteý nátıjesinde qatygez kelinshek sábıin 38 jerden pyshaqtaǵany anyqtaldy, dep habarlaıdy «Adyrna» tilshisi «KTK» telearnasyna silteme jasap.
Al kúdiktiniń kúıeýi: «Áıelim bosanǵan soń psıhıkalyq aýytqý baıqaldy» deıdi. Tipti sábıi jylaǵan kezde kózine eles kórinetinin jıi aıtqan. Áıelin emshige kórsetkenimen, dertine daýa tappapty.
«Náresteniń ólimi júrek qabyǵyn jaraqattaýymen, oń jaq qabyqshasyn jaryp ótken. Keýdesin tesip ótken. Ólim – túırep tesilgen jaraqat saldarynan, júrektiń qansyraýynan bolǵany anyqtaldy»,– dedi prokýror Nurbolat Ábilov.
Bes aı boıy tergelgen kúdikti búgingi sot otyrysyna qatysa almady. Óıtkeni 42 jastaǵy áıel psıhologııalyq dıspanserde qatań baqylaýda jatyr. Ondaǵy mamandar áıeldiń dıagnozyn sot otyrysy aıaqtalǵansha aıtýy tıis. Dárigerler osy kúnge deıin naýqastyń baýyr eti – balasyn izdep nemese ótken iske ókingen áreketin baıqamaǵan. «Biraq jaǵdaıy ázirge turaqty» - deıdi aq halattylar.
Sáýir aıynda Kóptoǵaı aýylynyń turǵyny tórt aılyq sábıin úıinde pyshaqtap óltirgen. Ol joldasy aýdan ortalyǵyna ketkende osyndaı qylmysqa barypty.
«Qazir ol áıel sot sheshimimen tamyzdyń 20-synan beri bizde emdelýde. Onyń dıagnozy ázirge dárigerlik qupııa bolyp sanalǵandyqtan, aıta almaımyn. Biraq júıke-júıesinde aýytqý bary jasyryn emes. Sot sheshimi shyqsa, naýqas áıeldi Almatyǵa emge jiberýimiz múmkin. Ázirge baqylaýda ustap otyrmyz»,– dep málimdedi Atyraý oblysy psıhıkalyq densaýlyq ortalyǵy dırektorynyń orynbasary Damır Qojamtaev.
«Adyrna» ulttyq portaly
