Bes birdeı adamdy atyp tastaǵan Igor Dýjnov 10 kompanııa men jeke tulǵalarǵa da qaryz bolyp shyqty, dep habarlaıdy «Adyrna» tilshisi «KTK» arnasyna silteme jasap.
Burynǵy otbasylyq dosynyń aıtýynsha, Dýjnov odan 35 myń eýro alyp, on jyldan beri bermeı zar qaqsatyp keledi. Endi biri qolhatpen bergen 200 myń dollarymdy qaıtarmady dep áleýmettik jelide shý kóterdi. Tipti bereshekti qaıtarmaýdyń amaly retinde odan eki jyldaı habar-oshar bolmaǵan. Sóıtse Igor Dýjnov osy ýaqytta Donbasstaǵy soǵysqa baryp keldim dep, jora-joldastaryna maqtanyshpen aıtyp júripti. Eger qaskóıdiń bul sózi ras bolsa, onda ol separatızm baby boıynsha da jaýapqa tartylýy múmkin.
Igor Dýjnovtyń otbasymen jýrnalıst Elena Vınokýrova uzaq jyldar boıy aralasqan eken. Biraq áýletter arasyndaǵy jaqsy qarym-qatynasty qyrýar aqsha buzypty. Iaǵnı Igor Dýjnov áriptesimizdiń anasynan on jyl buryn 35 myń eýro qolhatpen qaryz alǵan. Biraq bul bereshekti Vınokýrova áli kúnge deıin óndirip ala almaı júrgenin jetkizdi.
Al jýrnalıst Dıas Nuraqyn facebook jelisindegi paraqshasynda jańa derektermen bólisti.
“Aqbulaqta 5 adamdy jaıratyp tastaǵan "mergenniń" bizge beımálim sýreti jarııalandy. Igor Dýjnov Donbastaǵy soǵysqa qatysty degen qaýeset shyǵyp edi. Sol sóz ras sııaqty. Oń jaqtan sanaǵanda birinshi turǵan azamat Dýjnovqa qatty uqsaıdy. Reseılik arnaıy qyzmet onyń Ýkraınada soǵysta bolǵanyn, razvedgrýppada qyzmet etkenin anyqtapty-mys. Karabınin qushaqtap 2 jyl joǵalyp ketti dep jatyr edi»,– dep jazdy ol.
Igor Dýjnov qazir qamaýda otyr. Ol apta basynda úıin bosatýdy talap etken sot oryndaýshy, eki ýchaskelik polıııa qyzmetkeri men taǵy eki adamdy ańshy myltyǵymen aýlasynda jaıratyp saldy. Qandy oqıǵaǵa qatysty eki qylmystyq is qozǵalyp, tergeý amaldary júrgizilip jatyr.
«Adyrna» ulttyq portaly
