Óte uqypty, sándi kıingen bireý mıymdy mańyzdaı jedi.
«Men óıtpesem, men búıtpesem, men sóıtpesem»–dep yńyldaı berdi.
– Biz sendeılerdiń bolashaǵy úshin kún-tún demeı eńbek ettik. Sonyń arqasynda aýdanymyzdyń ál-aýqaty jaqsaryp, ekonomıkasy turaqtady. Ásirese, mal sharýashylyǵynyń, egin sharýashylyǵynyń óńi kirdi,– dedi aınalasyna alaqtaı qarap. Qabaq astyndaǵy tynymsyz kózi janyndaǵy meni elegen de joq. Alaq-julaq etedi. «Siz kimsiz?» – degen suraǵymdy jaratpady. Saýsaqtaryn shytyrlatyp,áńgimesin ary jalǵady. –Meniń arqamda aýyldyń maly túgendeldi. Qoılary qozdap, eshkileri laqtap, sıyrlary buzaýlady. Shuryq-tesik, qoralary bútindelip, terezeleri qalandy. Esikteri jańalandy. Meniń arqamda árkim qos-qostan ıt baqty. Olar úsh ýaq jýyndy ishti. Úı deısiz ba, qora deısiz ba, ogorod deısiz be urlyqtan ada boldy,– dedi entige sóılep.
«Keshirińiz, sonda siz kimsiz?» – dedim tańǵalyp. Ol bolsa suraǵymdy jaýapsyz qaldyryp: – Bilesiń be, meniń arqamda kósheler jaryqtandy. Burysh-buryshtyń bárine kameralar ilindi. Kún-tún demeı tártip saqshylary turǵyndardyń qaýipsizdigin baqylap, tynyshtyǵyn kúzetti. Meniń arqamda adamdar salaqtyqtan arylyp, uqyptylyqqa úırendi. Ásirese, aqsha ustaý, saqtaý mádenıetin myqty meńgerdi. Jalaqyny myj-myj qaltaǵa qattaýdy qoıyp, eıfke saqtaıtyn boldy,– dedi ahilep-úhilep.
Kóripkeldeı bárin baıandap turǵan adamdy tanymaǵanyma uıaldym. Ishimnen aýdandy basqarǵan ákim ıa prokýror dep oıladym. Ne bolsa da, sóz bermeı sampyldap turǵan álgiden kim ekenin suradym.
– Aǵa, keshirińiz! Aýyl úshin aıanbaı eńbek etipsiz! Balamnyń balasy bilip júretindeı áńgime aıttyńyz. Arasynda ózińizdi tanystyryp qoısańyz,– dedim bir sátte.
Ol betime suraýly kózben qarap turyp «Men, osy aýyldy jıyrma jyl shýlatqan baýkespe urymyn» – dedi de júrip ketti.
Serikjan Murasyl,
Almaty oblysy,
Raıymbek aýdany,
Narynqol aýyly
