Atyraý oblysynda medıa jáne aqparattyq saýattylyqqa arnalǵan «MediaLitFest» birinshi onlaın-festıvali resmı túrde óz jumysyn bastady.
Alǵash bolyp Halel Dosmuhamedov atyndaǵy Atyraý ýnıversıtetiniń Lıaılıa Qoıshyǵulova quttyqtaý sóz alyp, uıymdastyrýshylar men qatysýshylarǵa sáttilik tiledi. Al, shara barysyn atalǵan ýnıversıtettiń jýrnalıstıka kafedrasynyń meńgerýshisi Mənshúk Muqasheva júrgizip otyrdy.
– Qazirgi qoǵamdaǵy medıasaýattylyqty arttyrý qajettiligi bar ekendigin eskersek, bul joba ózekti ekendigi ras. Medıasaýattylyqtyń joqtyǵy aqparatty tutyný barysynda aqparattyq teńgerimsizdikti týdyrady: sanany ýlaý, qaýesetterge sendirý, jalǵan aqparat taratý, adamdardyń faktige súıengen derekter men aqparat kózin taba almaýy jáne taǵy basqa. Karantın jaǵdaıynda kóptegen adam ınternet resýrsy arqyly bilim alýǵa, aqparat alýǵa daǵdylandy. Alaıda, ınternette kontent jasaý men ony ornalastyrýdyń jappaı qoljetimdiligi onyń sapasy men shynaılyǵyna kepildik bermeıdi. Sondyqtan aqparat aǵyndaryn basqarý, oǵan beıimdelý jáne ózine qajetsiz aqparattardan aýlaq bolý biligi syndy medıasaýattylyq máseleleri – búgingi qoǵamnyń aldynda turǵan mańyzdy qajettilikterdiń biri, – degen oıymen bólisti jýyrda ǵana «Kitap mádenıetine qosqan úlesi úshin» medalin ıelengen, ýnıversıtettiń jýrnalıstıka kafedrasynyń meńgerýshisi Mənshúk Muqasheva.
Atyraýda alǵash ret ótip jatqan sharany uıymdastyrýshylardyń biri Tatıana Golýbova mundaı mol múmkindikti jiberip almaý qajettigin alǵa tartady.
– Ár qalanyń óz qupııasy men ereksheligi bar, – deıdi ol. – Meniń bir baıqaǵanym, Atyraý óte mýzykalyq jáne shyǵarmashylyq qala. Bul festıvaldiń «medıa» dep atalýy da tegin emes. Onyń ózgelerden ereksheligi sol, munda dybys, beıne, qozǵalystaǵy sýret, ónerdiń san alýan qyry qamtylǵan. Jýrnalıstıka men áleýmettik jeliler de medıakeńistiktiń bir bólshegi bolyp tabylady. Medıajýrnalıstıka baıyrǵy jýrnalıstıka negizderin óner elementterimen baılanystyra túsedi. Iaǵnı, bul sharada jýrnalıst bolǵysy keletin jandar án, áýen, kıno arqyly da shabyt alady, qanattanady. Bul joba ortalyqtandyrylǵan «MediaCAMP» baǵdarlamasy sheńberinde jasalǵan. Ony Halyqaralyq damý boıynsha AQSh agenttiginiń (USAID) demeýshiligimen «Internews» júıeli júzege asyryp keledi.
