Talǵat Bıgeldınovtiń jary Almatydaǵy azamattyq avıaııa akademııasyn batyrdyń esimimen atap, qala ortalyǵynan kóshe berilýin qalaıdy dep habarlaıdy "Adyrna" ulttyq portaly «Eýrazııa» birinshi arnasyna silteme jasap.
Sondaı-aq Keńes Odaǵynyń eki márte batyry atanǵan taý tulǵanyń jary maıdangerdiń mereıtoıyna oraı derekti fılm túsirip, kitap shyǵarýdy oılap otyr. Alaıda qarjynyń joqtyǵy qolbaılaý bolyp tur.
«Onyń ómiri men eńbek jolyna qatysty derekter burmalaǵanǵan. Sondyqtan batyrdyń ózi aıtqan derekter boıynsha kitap shyǵarǵym keledi. Jastar shyndyqty bilse eken deımin. Kóshe berýge kelsek, Shevchenkony almaıtyn shyǵar dep oılaımyn. Biraq Shevchenko men Qonaev bolsa nur ústine nur bolar edi. Óziniń turyp ketken úıi, aqyrǵy saparǵa shyǵarǵan úıimiz Qonaev kóshesi. Ne bolmasa Lenın kóshesi, Dostyq deıdi ǵoı, bárimizdiń dostyǵymyzdy biriktirip turyp, kósheni berse eken degen úmitim bar», — deıdi batyrdyń jary Uryndybıke Bıgeldınova.
Kelesi jyly Talǵat Bıgeldınovtiń dúnıege kelgenine 100 jyl. Mereıtoıǵa oraı kelimdi-ketimdi kisiler bolady dep Uryndybıke apa ózderi turǵan úıdiń kireberisin 5 qabatqa deıin kafeldep, jóndeý jumystary júrgizýge 10 mıllıon teńge jumsapty. Al úıdiń qasbeti men aýlasyn abattandyrýǵa shamasy kelmegendikten jergilikti ákimdikten kómek suraǵan. Biraq nátıje bolmapty. Ol qala ákiminiń qabyldaýyna birneshe jyldan beri kire almaı keledi. Bul máselege qatysty ákimdiktegiler de jýrnalısterge jaýap bermedi.
Aıta ketý kerek, sonaý 1945 jyly 23 jasynda Keńes Odaǵynyń eki márte batyry atanǵan Talǵat Bıgeldınovtiń soǵystan keıingi ómiri Almatymen tyǵyz baılanysty.
"Adyrna" ulttyq portaly.
