Azyq-túlik qymbattap ketti dep halyqtyń shyryldap júrgenine alty aıdan assa da, Úkimettegiler baǵany áli bir retke keltire almaı otyr, dep habarlaıdy “Adyrna” ulttyq portaly 31 arnaǵa silteme jasap.
Óıtkeni, baǵaǵa jaýaptylar tıisti jumystardy oryndamaǵan. Saýda mınıstri Baqyt Sultanov aýylsharýashylyǵy mınıstrligindegi áriptesteriniń 9 túrli sharany atqarmaǵanyn aıtty.
Ózderiniń de jarytyp jumys istegeni shamaly eken. Ákimder tipti múmkindikti qur jiberip, baǵany aspandatyp aldy, deıdi.
Jaǵdaıdy óz kózimen kórýi úshin QR Parlamenti Májilisiniń depýtaty Erlan Saıyrov bazar sharlap qaıtty.
31-arnanyń jýrnalısti Aıbar Tóljanuly baýyrymmen bazardaǵy azyq-túlik, ettiń baǵasyn baǵdarlap qaıttyq. Bir sózben aıtsaq, etke baǵa "kúıip" tur! Ásirese, qoı etiniń baǵasy aspanǵa sharyqtap ketken... Qoı eti kılogramy 3-myń teńgege jetken! "Bir toqty 60-myń teńgeden asady" deıdi saýdagerler. Meniń oıymsha, mınıstrler kabınetterinen shyǵyp, halyqtyń áleýmettik jaı-kúıin, baǵany baǵdarlap, naqty sharalar qoldanýy kerek! Búginde, halyq jappaı tutynatyn taýarlardyń (et, azyq-túlik) baǵasyna memlekettik retteý qajet!, - dep jazdy ol.
Depýtat qara bazardaǵy baǵa qarapaıym halyq úshin qymbat ekenin aıtty.
Kartoptyń baǵasy 450, sábizdiń baǵasy 400-den asqan. Al sarymsaq 150-den asyp otyr. Endi myna prodýktovyı nabordyń ózi 960 teńge bir kılogrammnan alǵan kezde. Qara bazardaǵy baǵa árıne halyq úshin qymbat, - dedi depýtat.
Aıta keteıik, Aýylsharýashylyq mınıstri Saparhan Omarov kartop baǵasyn alypsatarlar ósirip otyrǵanyn málimdegen bolatyn.
