Qarapaıym fashızm
Men shynymdy aıtsam, Islam Ábishevtyń osy kezge deıin tiri júrgenine tań qalamyn. Istemegenderi joq qoı jaýlarynyń. Iá, ol kisige ólerdeı óshtesip, jaýyǵyp, túrmeden tiri shyǵarmaımyz dep bekingen top bar.
Isekeń basynan tapsyryspen qamalyp, tapsyryspen sottalǵan adam. Berilgen tapsyrystyń negizgi máni - ol kisiniń múddesinde berilgen barlyq ótinishterge bas tartylý kerek eken, solaı boldy da.
Sózim dáleldi bolýy úshin, basynan bastaıyn, onda da eń negizgilerine toqtalyp keteıin:
Men advokat bop iske kiriskende, tergeýshiniń isti qazaq tilinde júrgizýge tıym salǵanyn estip bir shok boldym. Ol tek basy eken. Meniń jazǵan aryzymdy Bas prokýratýra qanaǵattandyrýsyz qaldyrady. Tergeý sotyna berip, sottasyp júrip áýpirimdep qazaqsha sóıleýge ruqsat alamyz.
Odan keıin birinen soń biri bastaldy. Aıdyń kúni amanda tergeýshiler Islam Ábishev pen Serik Túkıevti advokatsyz aldyrtyp, ekeýine “óz erikterimen” aryz jazdyrtyp, halyqaralyq “Qazaq kúresi” federaııasynan ketirip, ornyna Shpekbaev ózi otyryp alady.
Aryz jazǵan para berýshi Azamat Shaımerdenovtyń seksot ekenin aıtamyn, aıtyp qana qoımaı ony qujat túrinde dáleldep beremiz.
Osy isti qoldan uıymdastyrǵan Antıkordyń jedel qyzmet departamenti basshysy, ıaǵnı óz tilderinde aıtqanda Shaımerdenovtyń “qojaıyny” men provokator ekeýiniń ózara tyǵyz baılanysyn dáleldep beremiz.
Istiń provokaııaǵa qurylǵanyn qujat túrinde, baılanys quraldary jáne kýálerdiń jaýaptary arqyly dáleldep beremiz.
Úsh aı boıy telefony tyńdalyp, paraǵa qatysty esh áńgime aıtylmasa da, “para alǵysy kelgen sııaqty” - dep qorytyndy jazyp bergen sarapshylardyń áreketi zańsyz ekenin, ózderiniń eń úlken basshylyǵy - Respýblıkalyq saraptama ortalyǵy qorytyndysymen dáleldep berdik. Jibergen óreskel zań buzýshylyǵy úshin sarapshyny jaýapkershilikke de tartqyzdyq.
Úsh aı boıy “razrabotkada” júrse de, para almaı qoıǵan Ábishevke, para alýǵa oqtaldy, ıaǵnı para alǵysy keldi dep aıyp taǵýdyń jalpy absýrd ekenin dáleldep berdik.
Qazaqsha bir aýyz sóz aıta almaıtyn sýdıanyń, bizdiń isti qarap jatqan sýdıaǵa qatysty qarsylyqty (otvod) qaraı almaıtynyn dáleldedik. Ol sýdıany jumystan ketirdik.
Birde-bir dáleldi, negizdi ótinishimiz ne tergeýde, ne sotta ótpeı qoıǵasyn, bes advokat Joǵarǵy Sot aldyna mıtıngige shyǵýǵa da májbúr boldyq.
Biraq sonda da, Isekeńe baılanysty zań esh jumys jasamaı qoıdy.
Endi búgin advokaty Makısh Eskaraevpen habarlasyp taǵy shok bolyp otyrmyn. Isekeńdi bular týra maǵynasynda óltirgeli otyr deıdi! Sońǵy 6 aıda kolonııa basshylyǵy ne ózderi em jasamaıdy, ne arnaıy emdeý mekemesine jibermeıdi, tym qurysa, kovıdke qarsy ekpe alaıyn dese oǵan da ruqsat etpeıdi! Zeınet jasyndaǵy, júrekten esepte turǵan adamǵa nege olaı isteısińder dese, joǵarydan tapsyrma solaı deıtin kórinedi! Byltyr sot tergeýi kezinde, sot zalynda, eldiń kózinshe júrekten prıstýp ustap tórt ret qulap, jedel járdem shaqyrǵanymyz esimde. Al qazir jedel járdem turmaq, kovıdke qarsy ekpe alýǵa da ruqsat bermeı, qataıyp otyr kolonııa basshylyǵy!
Shynymdy aıtsam, aldaǵy sottan óz basym esh úmit kútpeımin. Tergeý isin zańdastyryp beretin notarıýstardan ne qaıran? Úmitim tek qana «Human Rights Watch», BUU janyndaǵy adam quqyǵy komıteti sııaqty halyqaralyq uıymdarda ǵana. Búgin túske deıin atalǵan uıymdarǵa aǵylshyn tilinde habarlama joldadym!
"Adyrna" ulttyq portaly
