Aqtóbe oblysy Yrǵyz aýdanynyń turǵyny Altynbek Orazalyuly Qazaq ulttyq agrarlyq ýnıversıtetiniń veterınarııa mamandyǵynda oqıdy. Qazir ol onlaın rejıminde bilim alýda. Bıyl 3-kýrsty támamdaıtyn Altynbek aýyldastarynyń malyn emdep, ota jasap júr dep habarlaıdy «Adyrna» ulttyq portalynyń tilshisi.
Buǵan deıin Altynbek alǵan bilimin tájirıbemen ushtastyryp, óz aýlasynda ólim aýzynda jatqan baspaǵyna ota jasap, aman alyp qalǵan bolatyn.
Altynbektiń otbasy aýdan ortalyǵynda tursa da, mal sharýashylyǵymen aınalysady. Qorasynda azyn-aýlaq iri qara jáne usaq maly bar. Sáýir aıynda qorasyndaǵy baspaǵy aýyryp, úı ishi ábigerge túsipti. Mal dárigerlerin shaqyrtqanymen, olar naqty dıagnoz qoıa almapty. Sodan Altynbek malynyń aram ólip qalmaýyn oılap, dereý ota jasaýǵa kirisken. Óz túısigi men bilimine sengen jas jigit álgi baspaqtyń ishki qurylysyna ota jasap, býda-býda jip alyp shyqqan.
Al ótken aptada bolashaq mal dárigeri Yrǵyz aýylynda turatyn Muhambetraqym Seıitmanbetovtiń sıyryna ota jasapty. Iri qara maly jem-sý ishpeı, jatyp qalǵan. Ota kezinde sıyrdyń mesqarynynan jip shyqqan. Qazir Altynbek kún saıyn sıyrdyń jaǵdaıyn qarap, baqylap otyr.
— Bilikti ustazdarymnan úırengen bilimim men tájirıbemdi is júzinde júzege asyrýǵa bel býdym. Osylaısha aldymen ishi keýip, aýyrǵan baspaǵyma ota jasap, ólimnen aman alyp qaldym. Onyń mesqaryny men kók etin kesip, ishinde jınalǵan jipti alyp shyqtym. Bizdiń aýyldyń syrtynda, mal jaıylatyn jerlerde turmystyq qaldyqtar kóp. Onyń ishinde ellofan, túrli qaǵazdar da bar. Sony jegenniń kesirinen maldyń ishki qurylysyna býda-býda jip bolyp jınalǵan. Al ótken aptada maly aýyryp qınalǵan aýyldasyma kómektesip, sıyryna ota jasadym.
Qazir aýyl ishinde maly, úıindegi ıt-mysyǵy aýyrǵan aýyldastaryma kómektesip, janýarlardy emdep júrmin. Bul úshin aqy almaımyn. Men úshin eń bastysy bilimimdi keńeıtip, tájirıbe jınaqtaý, — deıdi stýdent.
Búgingi kúni bolashaq mal dárigeriniń jasaǵan otalary yrǵyzdyqtardyń aýzynda júr. Al Altynbek bolsa oqý ornyn aıaqtaǵan soń, aýylyna kelip, qyzmet etýdi armandaıdy.
Altynbektiń ustazy, Qazaq ulttyq agrarlyq ýnıversıtetiniń «Akýsherlik, hırýrgııa jane ósip-óný bıotehnologııasy» kafedrasynyń professory, veterınarııa ǵylymdarynyń kandıdaty Qanat Qoıbaǵarovtyń aıtýynsha, mal dárigeri bolý — qıyndyǵy kóp, jaýapkershiligi mol jumys. Ol úshin qazirgi jastar aldymen bilimdi, ári ójet bolýy kerek.
— Medıınada qandaı jaǵdaı bolsa da eń bastysy — naýqasqa kómektesý. Sol sııaqty veterınarııada da mal aýyryp tursa, ony ýaqyt ótkizbeı emdeý kerek. Biz stýdentterge bilim bergende osyny úıretemiz.
Qazir bizdiń stýdentterimiz indetke baılanysty onlaın rejımde bilim alyp jatyr. Kún saıyn olar onlaın formatta teorııalyq bilimderin shyńdap, tájirıbe almasýda. Osy oraıda Altynbektiń qol jetkizgen jetistikterin estip, qýanyp jatyrmyz. Bul stýdent — jaýapkershiligi mol, salmaqty, bilimdi jigit. Onyń bilim alyp qoımaı, tájirıbe jınaqtap, sondaı-aq maly aýyrǵan aýyldastaryna kómektesip jatqanyna biz, ustazdary, erekshe qýanyp jatyrmyz. Osyndaı shákirtterimiz kóp bolsa, bizdiń bergen bilimimiz de, tájirıbemiz de tekke ketpegeni. Altynbekke dán rızamyz. Onyń mundaı jetistikteri — bizdiń basqa óńirlerde turatyn stýdentterge úlgi, — deıdi Q.Qoıbaǵarov.
"Adyrna" ulttyq portaly
