Nur-Sultan qalasy Qazaqstan halqy assambleıasynyń uıymdastyrýymen Kórisý kúni toılandy dep habarlaıdy «Adyrna» ulttyq portaly Qazaqstan Halqy Assambleıasyna silteme jasap.
14 naýryzda elimiz Naýryz meıramynyń basy Kórisý merekesin atap ótedi. Bul kúndi Amal merekesi dep te aıtady. Halyq qystan aman-esen shyqqanyna, kóktemge aıaq basyp, týys-týǵan, kórshi-kóleńmen júzdeskenine qýanyp, qol alysyp, tós qaǵysady. Bir-birine degen arazdyq, ókpe-renishti umytyp, amandyq tileıdi.
Elordadaǵy Dostyq úıinde Fanıda Muqataıqyzynyń jetekshiligimen Kórisý kúni toılanyp, oǵan barlyq etnomádenı birlestik ókilderi qatysty. Merekelik keshte Nur-Sultan qalasynyń «Esil tolqyndary» ardagerler ansambli óz ónerin kórsetti.
QR Prezıdenti Qasym-Jomart Toqaev qazaqstandyqtardy Kórisý kúnimen quttyqtaı otyryp:
«Ejelden kele jatqan ata saltymyz boıynsha jastar osy kúni úlkenderge sálem berip, batasyn alady. Jurt bir-birine aq tilekterin arnaıdy. Bul - naǵyz bereke-birlik pen yrys-yntymaqtyń meıramy», - dep jazdy Twitter-degi paraqshasynda.
