2019 jyly Óskemen qalasynda Halıfa Altaı quran jattaý ortalyǵy ashylǵan bolatyn. Ortalyq shákirtterdi dinı bilimge baýlyp, Quran Kárimdi jattamaq nıettegi jas býyndy ekinshi jyl qatarynan oqytyp keledi. Bıyl osy ortalyqtan ShQO boıynsha eń alǵashqy bolyp Asan Sáken Rýslanuly qarı atanyp shyqty.
Sákenniń ustazy, ári qarı Qudabaev Erbol Otanhanuly "Adyrna" tilshisine bergen suhbatynda shákirtiniń alǵyrlyǵyn atap ótti.
«Kez kelgen adam qarı bola alady. Ol úshin úsh-aq nárse kerek. Shynaıy nıet, ystyq yqylas, úzdiksiz eńbek. Sonda ǵana adam qarılyqqa jetpek. Sákenniń boıynda osy úsh qasıet boldy. Ol qarı bolý úshin 2,5 jyl eńbektendi. Tapsyrmany beretinmin. Kúndelikti tapsyrmany, kúndegisin buljytpaı oryndaıtyn. Úlgermeı qalǵan jaǵdaıda balalarmen oınaýǵa da shyqpaı, quran jattaıtyn. Onyń zerektigi men eńbekqorlyǵy osyndaı jetistikke jetkizdi",- dedi ol.
7-naýryz kúni han saraıyndaı meıramhanada Erbol ustaz óziniń besinshi qarıiniń qurmetine toı jasap, Rızabek Battaluly, Ersin Ámire, Baýyrjan Álı, Jáken Omarov, Qýat Qabdolda, Ardaq Nazarov, Sádýaqas Oljabaı syndy bedeldi kisilerdi qonaq etti.
2,5 jylda Qurandy tolyǵymen jattap, "nurdan táj kıgen" Sákenniń ákesi Rýslan Asanuly kópshiliktiń aldynda kóńili bosap: "Balam Quran jattasa dep armandaýshy edim, Allaǵa shúkir duǵam qabyl boldy"dep kóz jasyna erik berdi.
"Sáken meniń tuńǵyshym. Kishkentaıynan Quran súrelerin az-azdan jattatynmyn. Ár jattaǵan súresine syılyq berem dep qýantatynmyn. Bala kezinen zerek, alǵyr bolǵan balam, búgin mine Allaǵa shúkir 13 jasynda qarı atandy",-dep qýanyshyn bildirdi Rýslan myrza.
Sondaı-aq, Óskemen ortalyq meshiti Sákenge "Kishi qajylyqqa joldama" sertıfıkatyn tartý etti.
«Adyrna» ulttyq portaly
