2016-shy jyldan beri jer úshin aıtyspaǵan adamym, jazbaǵan kem-ketik tusy qalmaǵan shyǵar. Dál qazir ne desek te ótkendi ornyna keltire almaımyz. Biraq, jibergen olqylyqtyń ornyn toltyratyn múmkindik týyp tur.
Prezıdentimiz Q-J. Toqaev myrza qazaqtyń tarıhyndaǵy eń úlken qundy jarlyǵynyń birin jarııalady.
Qazaq úshin eń basty qundylyq —
1-inshi Táýelsizdiktiń jarııalanýy bolsa,
2-nshisi —shekaramyzdyń bekitilýi.
3-inshisi —sol jerimizdiń sheteldikterdiń ıemdenýinen saqtap qalý.
4-inshi —Til máselesi.
Qaısybir memleket bolsa da, osy tórt "taǵany" nyq bolsa, sol memlekettiń bolashaǵyna úlken senimmen qaraýǵa bolady.
Endi, memlekettigimizdi ustap turǵan osy tórt "taǵanymyz" nesimen qundy ekendigine toqtalyp ótsem.
1) Táýelsizdigimiz jarııalanyp, osy jarlyqqa qol qol qoıylǵan kúnnen bastap, biz derbes memleket boldyq. Bul ıgilikke eshqandaı qundylyq jetpeıdi. Ol daýsyz.
2) Shekaramyz belgilenip, álem kartasynan oıyp oryn alýy —bizdiń elimizdiń eldiginiń eń úlken sımvoly.
Jeri joqtyń— eli joq! Sondyqtan, táýelsizdik pen shekaramyzdyń belgilenýi bir-birinen bólip qaraýǵa kelmeıtin egiz uǵym.
3) Shet memleketterden jerimizdi qorǵaý - memlekettigimizdi qorǵaý. Elimizdiń 80%-y ASh jerleri ekendigin eskersek, Q-J. Toqaev myrzanyń bul jarlyǵy jerimizdi, eldigimizdi sheteldikterdiń "aranynan" alyp qalý(Basqa maqsattaǵy jerlerdi qorǵaıtyn arnaıy zańdar bar).
Bul degenimiz sońǵy 20 jyldaǵy jarlyqtardyń eń úlkeni deýge bolady.
Sondyqtan qadirin tereń túsinýimiz kerek!
4) Tilimizdiń máselesi de jaqyn bolashaqta sheshiletinine bek senimdimin. Osy máseleniń de sheshilýine az ǵana ýaqyt qalǵany kún ótken saıyn kórinip te, sezilip te keledi.
Al, endi "tórt taǵanymyzdy" shegelep alýdyń bar maqsaty --- eldigimizdi syrtqy kúshterden qorǵaý!
Búgingi kúnge deıin "Tórt taǵanymyzdyń" aldyńǵy ekeýi shegelenip qoıylǵan bolsa, búginderi taǵy bir "taǵanymyz" shegelenedi deýge ábden bolady.
Syrtqy kúshterden shekaramyzdyń ishindegi jerlerimizdi qorǵaıtyn zańdy bekitip alý týraly zańǵa ózgeris engizýge jarlyq shyǵarý— qazaq qazaq bolǵaly óz jerine tek ózi qojaıyndyq jasaýyna múmkindik beretin jarlyq!
Ultymyzdyń bolashaǵy úshin jasalyp otyrǵan árbir ıgi istiń baǵasyn bilý, baǵasyn ádil berý bizderdiń mindetimiz.
Árıne, sheteldikterge jerimizdi satqysy kelip otyrǵan "jýan toptardyń" aram pıǵyldarynan, Prezıdentimizdiń joldaǵan jalǵyz jarlyǵymen qorǵap qalý múmkin emes. Óıtkeni, sheteldikterdiń jerimizdi ımendenýine múmkindik beretin basqa da "shuryq-tesik" zańdarymyz bar. Olardyń bárin "kóshede júrip" bitep shyǵý múmkin emes.
Sondyqtan, Prezıdentimizdiń "Jer komıssııasyn qurý" jóninde joldaǵan tapsyrmasy, tóbedegi zańymyzdyń "jyrtyq-jamaýyn" tolyq biteý úshin, osyndaı qajettiliktiń týyndaıtynyn, ári eń tıimdi joly ekendigin tereń túsingendikten, halyqqa berip otyrǵan úlken múmkindik dep qaraýymyz kerek.
Aldaǵy moratorıde turǵan zańdarymyzǵa ózgeris engizip, ózge de "jyrtyq-jamaýyn" biteý úshin, prezıdentimizdiń "QR-nyń ASh jerleri shetel azamattary men zańdy tulǵalaryna satylmaıdy, jalǵa da berilmeıdi" degen jarlyǵy, bizderdiń(halyqtyń) jerdi satqysy kelip otyrǵan latıfýndıstterge qarsy "aıaq tirer" eń úlken tiregimiz bolmaq.
Mine,dál sondyqtan ǵana, Prezıdentimizdiń osy jarlyǵy sońǵy 20 jylda halyqqa jerimizdi qorǵap qalýǵa berip otyrǵan eń úlken múmkindiktiń biregeıi!
Osyny tereń túsine bileıik,
uǵyna bileıik!
Qurmetti áleýmet!
"Tar kórpemizdi" jan-jaqqa tartqylaýdy doǵaryp, osy jarlyqpen qurylatyn komıssııaǵa halyqtyń ishinen shyqqan eń senimdi, eń prınıpti, eń kóregen azamattardyń bolýy úshin jumylyp jumys jasaýymyz kerek.
Osy jolda buǵan deıin oryn alǵan basqa da máselelermen ashý -arazdyqqa barǵan azamattar bolsa, men olardy osy jolda keshirdim!
Osynaý qazaq úshin "... ne bel ketetin, ne belbeý ketetin" shaqta, halyqty jan-jaqqa tartqylaý — óz halqyna jasalǵan opasyzdyq bolyp tarıhta qalatynyn umytpasaq eken.
