Jambyl oblysy Sarysý aýdany Jańatas qalasyndaǵy 2 yqshamaýdandaǵy 5 qabatty turǵyn úıdiń 3-shi qabatynda órt bolyp, bes bala qaza tapty, dep habarlaıdy «Adyrna» tilshisi Jambyl oblysy ákimdigine silteme jasap.
Páter ishinde ata-ananyń qaraýynsyz kámelet jasyna tolmaǵan 2015, 2016, 2017, 2019 jáne 2020 j.t. bes bala qalyp qoıǵan.
Aldyn ala málimetter boıynsha, úıdiń otaǵasy jumysta bolǵan, al anasy dúkenge shyǵyp ketken. Órt saldarynan kámelet jasyna tolmaǵan balalar tútinge ýlanyp, jedel túrde aýrýhanaǵa jetkizildi. Alaıda araǵa biraz ýaqyt salyp, kóz jumǵan.
Oqys oqıǵanyń sebebin anyqtaý úshin Jambyl oblysy ákiminiń tapsyrmasymen arnaıy komıssııa quryldy. Oblys ákiminiń orynbasary Ulan Jazylbektiń tóraǵalyǵymen komıssııa oqıǵa ornyna attandy. Komıssııa quramyna prokýratýra, polıııa departamenti, tótenshe jaǵdaılar jónindegi departament pen basqa da múddeli memlekettik organdardyń ókilderi engen.
Jergilikti atqarýshy organdar tarapynan qara jamylǵan otbasyǵa jan-jaqty kómek kórsetiledi. Psıholog mamandar jumyldyrylyp, jerleý sharalaryn uıymdastyrýǵa járdem berilmek.
Jańatasqa Jambyl oblystyq TJD basshysy men jedel top, jyljymaly órt-tehnıkalyq zerthana, órt sóndirý qyzmeti men apattyq-qutqarý qyzmetiniń psıhologtary shyqty.
Budan bólek, Jańatas qalasyna oblys prokýrory Nurǵalym Ábdirov pen Polıııa departamentiniń basshysy Janat Súleımenov attandy.
Oqys oqıǵa ornynda órt sóndirý qyzmetiniń 6 qyzmetkeri 1 dana tehnıka jumys atqardy. Órt tolyǵymen aýyzdyqtaldy.
«Adyrna» ulttyq portaly
