Quran oqıtyn oryn ashyldy

1562

Táý etýshilerden syz ótpesin dep
Almaty oblysy, Ile aýdany, Pokrovka aýylyndaǵy Álmerek baba kesenesine táý etip kelýshilerge arnap quran oqıtyn oryn boı kóterdi.
Álmerek Janshyqulynyń balasy Jánibektiń urpaqtary qarajat jınap, quran oqıtyn nysandy saldy. Qurylys nysanyn salýǵa 5 mıllıon teńge kóleminde qarajat jumsaldy. Qajetti qarajatty jınaýda atymtaı-jomart azamattar Almasbek Nókerbanuly men Danııar Ysqaquly árqaısy 500 myń teńgeden aqshalaryn qosyp, orasan kómek jasady.
Yntymaq pen birliktiń arqasynda Álmerekuly Jánibek batyrdyń urpaqtary osynaý qarajatty jınap, mejeli merzimde quran oqıtyn oryn boı kóterdi.
"Bizdiń josparymyz boıynsha qurylys byltyrǵy jyldyń naýryz aıynda bastalyp, mamyrda aıaqtalýy tıis edi. Oǵan kóldeneń kılikken pandemııanyń pármeni qolbaılaý boldy. Buryndary ásirese kúzdiń qara sýyǵy qarly qysqa ulasqan mezgilde Álmerek babamyzdyń basyna kelip quran oqýshylardyń tabanynan syz ótip, dirdek qaǵyp jaýraıtyn edi. Endi mine Erjan Kákenov, Janat Qasymov basqaratyn "TOO Profı PGS" qurylys kompanııasynyń jigitteri jyp-jyly oryndy der ýaqytynda salyp berdi. Jyldyń tórt mezgilinde de babamyzdyń basyna táý etip kelýshilerdiń qatary sıregen emes. Sondyqtan da osyndaı quran oqıtyn oryn qajet bolǵandyqtan sharýany qolǵa aldyq" deıdi "Álmerek baba" mádenı-tarıhı qoǵamdyq qorynyń dırektory Ysqaq Moldálimuly.
Álmerek babanyń kesenesi mańynda keleshekte budan ózge osyndaı kóptiń ıgiligine arnalǵan nysandar boı kótermek. Abyz babadan taraǵan urpaqtary keleshekte keshenniń aınalasyn abattandyryp, kelýshilerdiń qajettiligin óteıtin taǵy birneshe nysandy salady.
Ilgeride kókshetaýlyq kásipker "Newton edu" kompanııasynyń dırektory Maqsat Jamankarın Álmerek abyz kesenesiniń aınalasyna jaryq jelisin tartyp, shamdaryn ornatyp samaladaı jarqyratyp, kóptiń alǵysyn alǵan edi. Batyr, áýlıe, abyz atanǵan babanyń kesenesi mańyndaǵy bulaqtan sý alýshylar úshin de jaryq jelisiniń tartylýyna kópshilik alǵysyn jaýdyrdy.

Q.Rahmet

 

Pikirler
Redakııa tańdaýy