«Nur Otan» partııasy Tóraǵasynyń Birinshi orynbasary Baýyrjan Baıbek jýrnalıst Nartaı Aralbaıulynyń YouTube-arnasyna bergen suhbatynda Reseı depýtattarynyń kótergen jer máselesine qatysty pikirin bildirdi. Jýrnalıst atalǵan daýly máselege qatysty partııanyń ustanymyn surady.
Jaqynda Reseı Dýmasynyń depýtattary «Reseı Qazaqstanǵa jer syılaǵan» dep aıdy aspanǵa bir-aq shyǵardy. Osy oraıda Baýyrjan Baıbek «Nur Otan» partııasynyń ókilderi alǵashqylardyń biri bolyp, ulttyq múddeni qorǵap, reseılik qos depýtatqa jaýap bergenin málimdedi.
«Ol depýtattar bul sózdi aıtqan kezde eń birinshi baǵa bergen Aıdos Sarym boldy. Ol qazir bizdiń partııa atynan Májiliske úmitker, saıasattanýshy. Kóp ótpeı Pavel Kazanev óz ustanymyn bildirdi. Ol partııamyzdyń Saıası keńesiniń múshesi, Partııalyq baqylaý komıtetiniń tóraǵasy
2013 jyly «Nur Otan» partııasy óziniń saıası tuǵyrnamasyn qabyldady. Sol kezde partııanyń ishinde keń aýqymdy kezdesýler, pikir talastar júrgen. Partııa zııaly qaýym ókilderimen, ÚEU múshelerimen sol qujatty talqylaǵan. Atalǵan negizgi qujatta elimizdiń eń úlken jetistigi de, qundylyǵy da memlekettiń táýelsizdigi dep anyq jazyldy. Bul buryn da, keıin de aıtylǵan túrli qısyq pikirlerge «Nur Otan»-nyń bergen naqty jaýaby bolatyn. Bul jaýap ózgergen emes. Partııanyń ustanymy - halyqtyń birligi, yntymaǵy, tutastyǵy asa mańyzdy», - dedi ol.
Baýyrjan Baıbek reseılik depýttardyń málimdemesi arzan atqa ıe bolýdyń amaly, qara bastyń qamy deıdi.
«Qazaqta «atyń shyqpasa, jer órte» degen sóz bar ǵoı. Qazir haıptyń ýaqyty. Men buryn bul depýtattardyń atyn estigen emespin. Olar osy sózderimen tanymal bolýǵa tyrysady», - dedi ol.
Sondaı-aq ol sózinde Qazaqstan shekarasy halyqaralyq qujattarmen moıyndalǵanyn, álemniń iri derjavalary elimizdiń jer tutastyǵyna kepildik bergenin qaıta eske saldy.
«Elbasy barlyq shekarany shegendedi. Qazaqstan ıadrolyq arsenaldan bas tartqan kezde AQSh, Qytaı, Reseı sekildi memleketter qujatqa qol qoıý arqyly resmı túrde elimizdiń terrıtorııalyq tutastyǵyna kepildik bergen. Sondyqtan shekaramyz bekitilgen», - dedi suhbatynda partııa Tóraǵasynyń Birinshi orynbasary.
Ult úshin mundaı mańyzdy máselede bıliktegi partııanyń basshylyǵy únsiz qalmaı, B.Baıbek te atalǵan jer daýyna qatysty óz ustanymyn anyq jetkizdi jáne ult tarıhynda tegin jerdiń bolmaǵanyn qadap aıtty.
«Qazaqtyń tarıhynda bizge eshkim eshqandaı jer syılaǵan joq. Barlyq jerimiz babalarymyzdyń mańdaı terimen, tógilgen qanymen búginge deıin aman jetti. Endi bizdiń, partııanyń, búgingi býyn jastardyń da mindeti - táýelsizdigimizdi nyǵaıtý», - dedi Baýyrjan Baıbek.
Iá, dıplomattarymyz, depýtattarymyz qajetti jaýabyn berdi. Bastysy – biz qazaqtyń tereń tarıhynda eshbir kórshimiz «mine, ala qoı» dep bir qarys jerin de syıǵa bermegenin bilemiz. Ulan ǵaıyr atyrapty qorǵaýda qazaqtyń ǵana qany tógilgen. Degenmen bul kúnde tek táýelsizbiz dep kókirek urý jetkiliksiz. Saıası, ekonomıkalyq, qarjylyq, demografııalyq, azyq-túlik, dıplomatııalyq, áskerı táýelsizdikti saqtaý da asa mańyzdy ekenin álemde bolyp jatqan sońǵy geosaıası proester dáleldep keledi. Óıtkeni osy salalardyń birinde ózgege kiriptar bolsaq, erkindigimizdiń jartysyn sol tarapqa jyryp berdik degen sóz.
Baýyrjan Baıbek suhbat barysynda Taýly Qarabahtaǵy qaqtyǵystyń qandaı jaǵdaılarǵa alyp kelgenin aıtyp, jer daýynyń saldary aýyr bolatynyn eskertti.
«Osyndaıda Elbasynyń «Táýelsizdikti alý qıyn. Al ony ustap qalý odan da qıyn» degen sózi eske túsedi. Qazirgi tańda qaǵaz júzinde ózin egemenbiz degen el kóp. Biraq de-fakto ózge memleketter bılep jatyr. BUU málimeti boıynsha, 60 jýyq memleket áli de shekara máselesin tolyqtaı sheshpegen», - dep oıyn qorytyndylady.
Suhbatynyń sońynda partııa Tóraǵasynyń Birinshi orynbasary tarıhty bilmeıtin adamdardyń teris oıyna bola kórshilermen qarym-qatynasymyz buzylmaýy tıis ekenin basa aıtty.
Baýyrjan Baıbektiń YouTube – arnaǵa bergen suhbaty jaqyn kúnderi jarııalanady.
