Almatyda «Namys» jastar qozǵalysynyń belsendileri Táýelsizdik alańyna baryp, Jeltoqsan qurbandarynyń rýhyna taǵzym etti dep habarlaıdy «Adyrna» ulttyq portaly.
Uıym belsendileri sheıit ketken bozdaqtarǵa quran baǵyshtady. Sonymen birge Qazaqstan terrıtorııasyna kóz alartqan reseılik saıasatkerlerdiń málimdemesine qatysty pikir bildirdi.
«Jırınovskıı, Nıkonov, Lımonov syndy darynsyz saıasatkerler búlik shyǵarǵysy kelip, ózderiniń saýatsyzdyǵyn kórsetti. Qazaqtyń namysyna tıip saıqymazaq boldy. Olar kitap betin ashyp, az da bolsa tarıhqa úńilse kimniń kim ekenin biletin edi. Qazaqtyń namysty jastary barda olardyń kózdegeni bola qoımaıdy», – dedi qozǵalys basshysy Azamat Joldanbaı.
Osy rette Qazaqstan Respýblıkasynyń Prezıdenti Qasym-Jomart Kemeluly Toqaevqa ún qatqan uıym belsendileri bılikke shart qoıdy. Olardyń atap ótkenindeı reseılik saıasatkersymaqtardyń saýatsyz málimdemesin jaýapsyz qaldyrýǵa bolmaıdy.
Jastar “Reseı ımperııasynan qalǵan Pavlodar, Petropavl degen ataýlar joıylyp, qalalarǵa qazaqı ataý berilýin” talap etti.
“Olar tarıhty zerttep, oqyp, oı túıgeni abzal. Tarıh betterine úńilsek Reseı túgili, shekaralas elderde qazaqtar, ıaǵnı, bizdiń ata-babalarymyz ómir súrgen, Qazaqı ataý arqalaıtyn qalalar kóp. Bul aqıqat!
Osy rette Qazaqstan Respýblıkasynyń Prezıdenti Qasym-Jomart Kemeluly Toqaevqa úndeý. Osyndaı saıqymazaq saıasatkerlerdiń tirlikterine qashanǵy beıjaı otyra beresizder? Sózben emes, qaǵazben emes, ISPEN dáleldeıtin kez keldi ǵoı.
Reseı ımperııasynan qalǵan Pavlodar, Petropavl degen ataýlar joıylsyn, qalalarǵa qazaqı ataý berilsin! Soltústik aımaqtarda Qazaq tili ústemdik jasasyn!
Qazaqtar QYZYLJAR jáne ERTIS degen ataýdy paıdalanǵan. Sol ataýlar qaıtarylsyn”, – dedi «Namys» jastar qozǵalysynyń belsendileri.
Jastar bul talap oryndalmasa Soltústik Qazaqstanǵa baryp mıtıng ótkizetinderin aıtty.
