Máselen, fotograf Jansaıa Qanaıqulova osyǵan deıin 60-qa jýyq júkti kelinshekke fotosessııa jasaǵan dep jazady "Adyrna" ulttyq portaly Paryz.kz saıtyna silteme jasap.
Buryn jas kelin júkti bolǵanda, bul jańalyqty elden jasyryp, tipti, ata-enesine aıtýdan uıalatyn. Bul bir jaǵynan ishke bitken balanyń aman-esen dúnıege kelip, kelinshektiń osy kezeńdi ońaı ótkerýine septik etedi deıtin úlkender. Al sońǵy kezderi elimizde aıaǵy aýyr áıelder ishin jalańashtap sýretke túsýdi ádetke aınaldyra bastady. Muny sońǵy trend dep bilgen jandar jurttan "súıinshi" suraǵan fotosessııa barysyn jelilerge jarııalaýdy da umytpaıdy, dep habarlady paryz.kz, "Eýrazııa birinshi arnasyna" silteme jasap.
Iá, bul – birneshe jyl buryn ǵana paıda bolǵan jańa trend. Jańashyldyqtyń sońynan eremiz dep talaı júkti kelinshek qarnyn ashyp fotosessııa jasap álek. Sánnen qalyspaǵandardyń biri – Balnur Qýantaı.
"Birinshiden, men ol jerde jalańash túsken joqpyn. Ishim ashyq bolǵany bolmasa, bylaı kóz tıedi degen zattan biz ózimiz qorqamyz. Men sońyna deıin kórsetken joqpyn, balany bosanyp, adam bolyp, kishkene ózimizge kelgennen keıin ǵana baryp, ınstagramǵa salyp, dostarymmen, jaqyn adamdarmen bólisip, elge jarııaladyq", - deıdi ol.
Balnurdyń bal-bul jaınaǵan júzin kórip joldasy da qoshtaı túsken. Dese de úı úlkenderi jaqtaı qoımapty. Kóz bar, sóz bar degendeı.
"Mama renjip qaldy. Biraz ýaqyt sóılesken de joqpyz. Sol sýretti kórip, fotossesııa jasaǵan soń sýret jibergen bolatynmyn mamama. Ol maǵan renjip, ursyp-ursyp, "Osy sender qandaı qyzsyńdar?" dep ursyp, biraz ýaqyt menimen sóılespeı qoıǵan. Sosyn baryp kishkene túsinip, meni keshirdi, unady", - deıdi vızajıst.
Bul úlkender úshin tańsyq bolýy múmkin. Biraq jas kelinshekter úshin esten ketpes estelik. Máselen, fotograf Jansaıa Qanaıqulova osyǵan deıin 60-qa jýyq júkti kelinshekke fotosessııa jasaǵan.
"Bul 2018 jyldan beri Beıonse bastaǵannan álemdik trend bolyp ketti. Júkti áıelder osyndaı vok stılde deıdi ǵoı, sondaı matamen ılı bodı, sondaı stılde fotosessııa jasaǵandy unatady", - deıdi ol.
Degenmen qoǵam belsendisi qursaǵyn jalańashtap, jurttyń kózinen jasqanbaıtyn jastarǵa renishin bildirdi. Trend dep júrip, mentalıtetimizden aıyrylyp baramyz degen paıymda.
"Aıaǵy aýyr kelinshektiń qarnyn ashyp sýretke túsýi degen, bul endi tipten mádenıettiń tómendigeniniń bir túri shyǵar. Ol bir jaı úrlep qoıǵan qaryn emes, onyń ishinde urpaq bar ǵoı. Bala bar. Ol balanyń keleshegi bar. Ol ózin oılamasa da, balanyń keleshegin oılaý kerek qoı. Sol jalańash túsken sýret balanyń ómirlik keleshegine balta shabýy da múmkin", - deıdi qoǵam belsendisi Qarlyǵash Bekpatsha.
Iá, buryndary júkti ekenin jarııalap fotoǵa túspek túgili, analarymyz 9 aı boıy qursaǵyn bóten kózden jasyryp ustaǵan edi. Al qazir zaman da, kózqaras ta ózgergen. Kez kelgen jańashyldyqtyń jaqsy jaǵyn ǵana qabyldaǵan jón deıdi mamandar.
