Táýelsizdik kúni elordadaǵy Jaqsylyq Úshkempirov atyndaǵy jekpe-jek saraıynda kásipqoı boks keshi ótti, dep habarlaıdy «Adyrna» QazAqparatqa silteme jasap.
«Kóshpendiler shaıqasy» atty kásipqoı boks keshin «SuleimenPromotions» promoýterlik kompanııasy uıymdastyrdy.
Boks keshinde sharshy alańǵa shyqqan qazaqstandyq bylǵary qolǵap sheberleri Bek Nurmaganbet (2-0, 1 KO), Evgenıı Pavlov (2-0, 2 KO), Bekzat Nurdáýletov (1-0, 1 KO) jáne Danıla Semenov (1-0, 1 KO) qarsylastaryn qapy qaldyrdy.
Sondaı-aq, keshtiń basty jekpe-jekginde ekinshi orta salmaqta óner kórsetip júrgen qazaqstandyq kásipqoı boksshy Aıdos Erbosynuly (14-0-0,9KO) jeńilip kórmegen ganalyq boksshy Issa Samırmen (19-0-0,16KO) qolǵap túıistirip, qarsylasyn úshinshi raýndta tehnıkalyq nokaýtpen jeńdi. Osylaısha, Erbosynuly ózine tıeseli WBC Asia, WBAInternational jáne WBO Global tıtýlyn sátti qorǵap qaldy.
Eske sala keteıik, Aıdos Erbosynuly sońǵy ret Mınskide sharshy alańǵa shyǵyp, germanııalyq boksshy Nýhý Lavaldi (27-8-0,15 KO) tóreshiler sheshimimen jeńgen bolatyn.
«Adyrna» ulttyq portaly
