«Bas redaktorlar klýby» qoǵamdyq birlestigi 200-den asa respýblıkalyq jáne aımaqtyq buqaralyq aqparat quraldary basshylarynyń basyn biriktiredi.
«Oqýlyq» respýblıkalyq ǵylymı-praktıkalyq ortalyǵynyń dırektory Ǵanı Beısembaev pen «Bas redaktorlar klýby» qoǵamdyq birlestiginiń prezıdenti Bıbigúl Jeksenbaı ózara yntymaqtastyq týraly memorandýmǵa qol qoıdy. Qol qoıý rásimine Bas redaktorlar klýbynyń músheleri jáne aımaqtyq BAQ basshylary qatysyp, ózara pikiralmasý onlaın rejıminde ótti, dep habarlaıdy Almaty.tv.
Taraptar birinshi kezekte oqýlyq mazmunynyń sapasyn arttyrý men saraptamalyq qoǵamdastyqpen yntymaqtastyq boıynsha aqparattyq máselelerdi damytý jáne qazirgi tańda kún tártibinde ótkir turǵan kitap oqý saýattylyǵyn kóterý baǵyttary boıynsha ýaǵdalasty.
Shara barysynda Ǵ.Beısembaev Memleket basshysynyń Ulttyq qoǵamdyq senim keńesinde aıtqan buqara halyqty kitap oqıtyn ultqa aınaldyrý jáne el azamattaryn kitap mádenıetine baýlýǵa qatysty tapsyrmalaryn oryndaý boıynsha medıa alyptarymen tize qosa, birlesip jumys jasaıtyn kezdiń kelgenin atap ótti. Sonymen qatar ol osy yntymaqtastyq aıasynda aqparattyq súıemeldeýge ıek artyp, óskeleń urpaqtyń oqýǵa degen súıispenshiligin arttyrýǵa baǵyttalǵan jalpyhalyqtyq fleshmob ótkizý týraly usynys jasady.
«Balanyń oqýǵa degen qyzyǵýshylyǵy, qorshaǵan ortany kitap arqyly tanýy – buqaralyq aqparat quraldarynyń da basty nazarynda bolýǵa tıis. Óıtkeni bul til men dildi, ekonomıkany da qatar qamtıdy. Eger osy baǵytta siz ben biz bolyp, nátıjege den qoıa yntymaqtasa qozǵalsaq, onda aldaǵy bes jyldyń kóleminde qazaq BAQ-nyń damýyna da dańǵyl jol ashylar edi», –dedi Ǵ.Beısembaev.
«Bizdiń uıymdar arasynda jasalǵan memorandýmnyń joǵary qundylyǵy men mazmunyn atap ótkim keledi. Bas redaktorlar klýbynyń barlyq músheleriniń atynan «Oqýlyq» ortalyǵyna áleýmettik mańyzdy qyzmetinde úlken tabys tileımin jáne jemisti yntymaqtastyq pen birlesken jobalardy júzege asyrýǵa nıettimiz», – dedi B.Jeksenbaı.
Esterińizge sala keteıik, «Bas redaktorlar klýby» qoǵamdyq birlestigi 200-den asa respýblıkalyq jáne aımaqtyq buqaralyq aqparat quraldary basshylarynyń basyn biriktiredi.
«Oqýlyq» RǴPO bilimniń mazmunyn baǵalaý, oqýlyqtar men oqý-ádistemelik keshenderdi saraptaý arqyly bilimniń sapasyn qamtamasyz etýge atsalysady. Ortalyq óziniń quzireti sheginde QR Bilim jáne ǵylym mınıstrliginiń mindettemelerin oryndap, oqýlyqtardyń sapasyn arttyrý, sondaı-aq óskeleń urpaqtyń bilimin jetildirý baǵytynda jumys isteıdi.
