Shyńǵys MUQAN: Budan bylaı mektepte aqsha jınalmaıdy

2900
Adyrna.kz Telegram

Shymkent qalasy ákiminiń birinshi orynbasary Shyńǵys MUQAN Facebook paraqshasynda qala mektepterindegi jumysqa turýdyń júıelengenin aıtty. Ákim orynbasarynyń aıtýynsha, bilim berý salasyndaǵy bul tájirıbeni ózge oblystar da zerttep jatyr.

Ol: «Shymkenttiń mektepterine jumysqa turýdy júıeledik. Para bermeı jumysqa turý múmkin ekenin bıyl muǵalim bolǵandardan surańyz, rastaıdy. Tamyz aıynan bermen qaraı, 349 muǵalimdi jumysqa qabyldadyq. Onlaın jáne oflaın olarmen eki ret júzdestim. Bul tájirıbemizdi basqa oblystar da zerttep jatyr. Budan bylaı balabaqsha men kolledj qyzmetkerlerin de osy júıe arqyly jumysqa alamyz.

Bilim uıymdarynyń basshylaryn jumysqa alýdy da qatań talaptarǵa saı ótkizip jatyrmyz. Oǵan tájirıbeli ustazdar, qoǵam belsendileri men jýrnalıster kýá» - deı kelip, bilim berý salasyndaǵy jemqorlyq pen mektepterdegi aqsha jınaýǵa qarsy pikirin de bildirdi.

Kesheden beri mektepterde muǵalimder men ata-analardan jınalatyn aqsha kúntártibine shyqty. Búgin tańerteń Shymkent qalasyndaǵy mektepterdiń dırektorlaryn eskerttim. Budan bylaı mektepterde aqsha jınalmaıdy. Mektepterdegi alym-salym – zańsyz. Zańdy buzǵan mektep basshylary zań aldynda jaýap beredi. Aqsha jınaýǵa qajettilik joq. Memleket bilim berý salasyn tolyq qarjylandyryp otyr.

Ata-analar men muǵalimderdi AQShA JINAÝǴA QATYSPAÝǴA ShAQYRAMYN. Ondaı jaǵdaı bolsa, habarlasyńyzdar.

Bilim berý salasyn tazalaı almasaq, sapaly bilim týraly aıtýdyń ózi artyq. Bilim basqarmasy, mektep dırektorlary, muǵalimder men ata-analar kóleńkeli keleńsizdikke jol bermeı, kúsh-qaıratymyzdy bir maqsatqa jumyldyrsaq, balalarymyzǵa sapaly bilim berý jolynda kúsh biriktirsek, Shymkent qalasynyń bilim salasyn Qazaqstanda aldyńǵy qatarǵa shyǵaratynymyzǵa senemin», - deıdi.

Aıta keteıik, buǵan deıin Shymkentte Sybaılas jemqorlyq quqyq buzýshylyq kórsetkishi 50 paıyzǵa azaıǵandyǵy týraly aqparat talqylanyp, kópshilik  nazaryna ilikken de bolatyn.

Foto ashyq derekkózden alyndy

«Adyrna» ulttyq portaly

 

Pikirler