Şymkent qalasy äkımınıŋ bırınşı orynbasary Şyŋǧys MŪQAN Facebook paraqşasynda qala mektepterındegı jūmysqa tūrudyŋ jüielengenın aitty. Äkım orynbasarynyŋ aituynşa, bılım beru salasyndaǧy būl täjıribenı özge oblystar da zerttep jatyr.
Ol: «Şymkenttıŋ mektepterıne jūmysqa tūrudy jüieledık. Para bermei jūmysqa tūru mümkın ekenın biyl mūǧalım bolǧandardan sūraŋyz, rastaidy. Tamyz aiynan bermen qarai, 349 mūǧalımdı jūmysqa qabyldadyq. Onlain jäne oflain olarmen ekı ret jüzdestım. Būl täjıribemızdı basqa oblystar da zerttep jatyr. Būdan bylai balabaqşa men kolledj qyzmetkerlerın de osy jüie arqyly jūmysqa alamyz.
Bılım ūiymdarynyŋ basşylaryn jūmysqa aludy da qataŋ talaptarǧa sai ötkızıp jatyrmyz. Oǧan täjıribelı ūstazdar, qoǧam belsendılerı men jurnalister kuä» - dei kelıp, bılım beru salasyndaǧy jemqorlyq pen mektepterdegı aqşa jinauǧa qarsy pıkırın de bıldırdı.
Keşeden berı mektepterde mūǧalımder men ata-analardan jinalatyn aqşa küntärtıbıne şyqty. Bügın taŋerteŋ Şymkent qalasyndaǧy mektepterdıŋ direktorlaryn eskerttım. Būdan bylai mektepterde aqşa jinalmaidy. Mektepterdegı alym-salym – zaŋsyz. Zaŋdy būzǧan mektep basşylary zaŋ aldynda jauap beredı. Aqşa jinauǧa qajettılık joq. Memleket bılım beru salasyn tolyq qarjylandyryp otyr.
Ata-analar men mūǧalımderdı AQŞA JİNAUǦA QATYSPAUǦA ŞAQYRAMYN. Ondai jaǧdai bolsa, habarlasyŋyzdar.
Bılım beru salasyn tazalai almasaq, sapaly bılım turaly aitudyŋ özı artyq. Bılım basqarmasy, mektep direktorlary, mūǧalımder men ata-analar köleŋkelı keleŋsızdıkke jol bermei, küş-qairatymyzdy bır maqsatqa jūmyldyrsaq, balalarymyzǧa sapaly bılım beru jolynda küş bırıktırsek, Şymkent qalasynyŋ bılım salasyn Qazaqstanda aldyŋǧy qatarǧa şyǧaratynymyzǧa senemın», - deidı.
Aita keteiık, būǧan deiın Şymkentte Sybailas jemqorlyq qūqyq būzuşylyq körsetkışı 50 paiyzǧa azaiǧandyǧy turaly aqparat talqylanyp, köpşılık nazaryna ılıkken de bolatyn.
Foto aşyq derekközden alyndy
«Adyrna» ūlttyq portaly
