"Táýelsiz baqylaýshylar" Qoǵamdyq birlestigi prezıdent Qasym-Jomart Toqaevqa resmı hat joldady dep habarlaıdy «Adyrna» ulttyq portaly qoǵamdyq birlestik ókili Araılym NAZAROVANYŃ hatyna silteme jasap. Ótken saılaýda táýelsiz baqylaýshynyń qyzmetin atqaryp, túrli qıturqylyqty óz kózderimen kórip, kýá bolǵan azamattar aldaǵy parlament saılaýynyń ádil ótýin talap etýde. Ádildiktiń alǵy sharty retinde birlestik ókilderi Ortalyq saılaý komıssııasy men bılik partııasy basshylarynyń arasyndaǵy týystyq qatynasty kóldeneń tartady. OSK pen bılik partııasynyń basshylary ózara quda ekenin aıtqan táýelsiz baqylaýshylar mundaı týystyq baılanys kezinde ádil saılaý ótýi múmkin emes deıdi.
Qurmetti, Qasym-Jomart Kemeluly!
Biz - byltyrǵy ótken Prezıdenttik saılaýda saılaý ýchaskelerinde bolǵan kóptegen zańbuzýshylyqtar men saılaý mádenıetiniń tómendigin, halyq arasynda saılaýǵa degen senimsizdiktiń qandaı deńgeıde ekenin kórgen táýelsiz baqylaýshylarmyz. Byltyrǵy saılaýdan keıin resmı túrde «Táýelsiz baqylaýshylar» QB retinde birneshe aımaqtarda tirkeýden óttik. Bizdiń basty maqsatymyz – ádil saılaýdyń ótýine atsalysý, árbir qazaqstandyqqa óz daýysynyń mańyzdylyǵyn jetkizip, saılaý mádenıetin, saılaýǵa degen senimdi qalyptastyrý. Tek ádil de taza saılaý ǵana beıbitshiliktiń kepili bolady dep bilemiz. Ádiletsiz saılaý qoǵamda qarsylyq akııalaryn týdyryp, ishki tolqýlarǵa alyp keledi. Oǵan dálel retinde alysqa barmaı-aq keshegi Belarýs pen kórshi Qyrǵyzstan elindegi saılaýlardy atap ótsek bolady. Buǵan deıin de Grýzııa, Armenııa, Ýkraına elderindegi maıdandardyń sebebi de osy ádiletsiz saılaýdyń nátıjesi emes pe edi?! Biz elimizde beıbitshiliktiń bolǵanyn, Qazaqstannyń kez-kelgen azamaty óz tańdaýynyń mańyzdy ekenin túsine otyryp, daýys bergenin, kez-kelgen tańdaý shynaıy halyqtyq bolǵanyn qalaımyz.
A. Lınkoln «Saılaý bıýlleteni – oqtan da kúshti» degen eken. Iá, teorııada solaı. Al, ókinishke qaraı, búginde bizdiń elde saılaý - senimsiz alań, bıýlleten – qunsyz qaǵazǵa aınaldy. Halyq arasynda saılaýǵa degen senimsizdiktiń bolýynyń sebepteri kóp. Byltyrǵy saılaýda ol sebepterdiń neden týyndaǵanyn biz óz kózimizben kórdik.
Qurmetti, Qasym-Jomart Kemeluly, Sizden osy Parlament saılaýynyń taza, ádil ótýin qamtamasyz etýińizdi, halyqqa saılaýǵa degen senimdi qaıtarýyńyzdy suraımyz. Ýaqyt ótedi, zaman ketedi, al saılaýǵa degen senim men saılaý mádenıeti ǵasyrdan ǵasyrǵa naǵyz demokratııanyń beınesi bolyp qalýy úshin taza saılaýǵa qadamdy búgin jasaýymyz kerek.
Aldaǵy Parlament saılaýyna halyq arasynda óte úlken senimsizdik bar. Oǵan sebepterdiń biri retinde Ortalyq saılaý komıssııasynyń tóraǵasy Berik Imashev pen bılik partııasy tóraǵasynyń týystyǵy. Qazaq qudasyn qudaıyndaı syılaǵan elmiz. Saılaýdy uıymdastyrýshy qurylymnyń basshysy básekege qatysýshy partııa basshysynyń otbasyna jaqyn tulǵa bolýy moraldyq turǵyda B. Imashev myrzanyń ózine dıskomfort, saılaýǵa qatysýshy basqa partııalardyń jeńiske degen úmitine kirbiń, halyqtyń ádil saılaýǵa degen senimine kúmán týdyratyny anyq. Osyǵan oraı, Sizden, OSK-niń tóraǵasy B. Imashevti qyzmetinen bosatýyńyzdy suraımyz. Bul, aldaǵy saılaýdyń taza ótýiniń alǵysharty bolatyn edi. Bul tek bizdiń baqylaýshylardyń ótinishi emes. 2020 jylǵy 31 qazanda Almaty qalasynda ótken mıtıngtiń qararynda da osy talap qoıylǵan bolatyn. Kóptegen azamattyq belsendiler aıtyp, halyqtyń kókeıinde júrgen másele. Siz tyńdaýshy memleketti qalyptastyrýshy azamat retinde halyqtyń kókeıinde júrgen bul máseleni beı-jaı qaldyrmaı, qulaq asasyz dep úmittenemiz.
Foto ashyq derekkózden alyndy.
